Atualità
Smueia desdruj cater cëses a Badia: sada cunferënza stampa cun Durnwalder
USP – La situazion dles viles de Anvì y Sottrù a Badia ie deventeda mo plu dramatica: l rone che se ova bele muet n juebia, à (NCUEI) n vënderdi domesdì, 14 dezëmber, desdrù trëi cëses a Anvì. I abitanc fova bele la sëira dant mucei ora de cësa. Duman sada jirà presidënt Durnwalder nstëssa a ti cialé ala situazion y per la 11.00 iel udù dant na cunferënza stampa.
La juebia sëira ova passa trënta persones messù lascé si cëses manacedes da unì tëutes pea da na smueia. La families ie unides menedes demez cun l aiut di destudafuech y de giac dala nëif. La nuet ie stata plutosc chieta nchin che ntëur la 5.30 da duman se ala inò muet. “l raion tucà ne ie nia drë ërt, purempò mëina dut l rone y gëura de majera sfëntes te streda” spiega Hanspeter Staffler che mëina l zënter de prutezion zevila dla Provinzia. Danter esperc provinziei, dl Chemun y destudafuech iel feter 80 persones mpeniedes sun l post. Nce da Roma iel bele unì tëut su cuntat cun la zentrela de prutezion zevila. La smueia dëssa tò ite 40 hectar sun n raion de feter 400 per 1000 metri.
Do marënda, ntëur la 13.00, ie la situazion inò deventeda plu dramatica. Cater cëses a Anvì fova plu manacedesy chëstes ie unides desdrudes. I esperc ne possa te chësc mumënt fé nia per fermé la smueia. Davia che l raion ie bëndebò grant iel drët rie tò pruvedimënc. “Nosc esperc possa me monitoré la rone y avisé demez l’eghes” spiega Luis Durnwalder che à la cumpetënza dla prutezion zevila tla Jonta provinziela y che ie perchël for nfurmà sun la situazion.
L rone se muev śën da 10 a 15 metri al’ëura. Perchël vëniel nce tenì sot a cuntrol ntan la nuet. Ntan an nrescì che chësc raion fove dan feter 200 ani bele unì tucà da na smueia che ova desdrù 17 luesc da paur.
L presidënt dla Provinzia Luis Durnwalder, respunsabl per la prutezion zevila, vijiterà duman la raion. Deberieda cun la zentrela de ntervënt dl Chemun ie udù dant na cunferënza stampa
dala 11.00
tl Chemun de Badia.
as
Galaria dales fotografies
