Atualità
Agricoltöra da munt: les regiuns alpines sostëgn la Comisciun UE
USP - Sostignì les propostes dla Comisciun UE a bëgn dl'agricoltöra da munt y tl medemo tëmp presentè n valgönes mudaziuns al plann dla Comisciun europeica: chisc é i obietifs dla rëi danter les regiuns alpines sostignida dal Südtirol tratà (INCÖ) ai 9 de jenà a Bruxelles tratan le summit cun le comissar UE Dacian Ciolos.
I rapresentanć politics dl setur agricul dles regiuns alpines s’à incuntè a Bruxelles por le summit sön le dagnì dl'agricoltöra da munt y les ressurses por le tëmp de programaziun UE 2014-2020: cun l'assessur provinzial Hans Berger êl inće l'europarlamentar südtirolesc Herbert Dorfmann, i responsabli regionai Helmut Brunner (Bayern), Erich Schwärzler (Vorarlberg), Anton Steixner (Tirol), Sepp Eisl (Salzburg), Tiziano Mellarini (Trentin), Claudio Violino (Friuli Venezia Giulia) y Giuseppe Isabellon (Val d'Aosta), chël ô dì dötes les regiuns che fej pert dla rëi sostignida dal Südtirol. Tratan le convëgn s’ài confrontè cun le comissar UE Ciolos y cun Paolo De Castro, presidënt dla Comisciun agricoltöra dl Parlamënt europeich.
Ai dui politics UE ti à les regiuns da munt confermè les propostes de sconanza y svilup dl'agricoltöra da munt da preodëi tl proscim tëmp de programaziun di fonds, "chëstes propostes va bele te tröc seturs a öna cun les mosöres dla Comisciun UE", à sotrissé l'assessur Berger. La scomenciadia de Bruxelles é stada porchël n'ocajiun por rengrazié la Comisciun dl impëgn por l'agricoltöra da munt y confermè le sostëgn dles regiuns, dantadöt ti confrunć di stać mëmbri, por promöie les ativitês rurales desvalies che ti conzed al paur da amplié les fontanes de davagn.
Les regiuns alpines s’à damanè na mudaziun por ći che reverda la determinaziun dl'indenité de compensaziun: "300 euro por hetar é na soma che ne conzed nia da sostignì les aziëndes dër desvantajades", à dit Berger, che à porchël damanè che al gniss alzè le limit mascim mesan o che al ne vëgnes scenò nia calcolè aladô dla singola impresa agricola mo a livel regional o statal.
L'aziun da smendrì la burocrazia por les pices aziëndes rurales portada dant dala Comisciun UE à ciafè le consëns de dötes les regiuns alpines. "Al é preodü alisiraziuns por i contribuć basc y i s’audun che chësc vëgnes fat inće por düć i aiüć UE", à ajuntè l'assessur Berger. Al vëgn inće damanè che les sperses de pastöra vëgnes ma calcolades por i contribuć sce ares vëgn veramënter laurades, "a na moda da ne sovenzionè nia terac arbandonà", à dit Berger. Chisc punć vëgn sostignis dala rëi dles regiuns alpines por la sconanza di interesc dles pices impreses agricoles da munt, "che ne dess nia passè sön n secundo livel y lascè döta la lerch ales aziëndes agricoles de de gran dimenjiuns", à stlüt jö Berger.
usp
Galaria dales fotografies
