Atualità
Pest artistich de scoltöra Richard Agreiter 2013 y Trienala Ladina 2013
USP - Le Museum Ladin Ćiastel de Tor scrî fora dui concursc por sostignì y fà conësce i artisć ladins y les artistes ladines. Al Pest artistich de scoltöra Richard Agreiter 2013 pol tó pert düć i artisć y les artistes de scoltöra dl raiun dl Tirol storich (Nord-, Ost- y Südtirol, Trentin y les valades ladines de Badia, Gherdëna, Fascia, Fodom y Ampëz) y la Trienala Ladina é por düć i artisć y les artistes dles cin valades ladines dles Dolomites, di Grijuns y dl Friûl.
Cun chësta scomenciadia déssel gnì valorisé y sostignì la produziun artistica ladina y al ti dess gnì pité a chi che tol pert la poscibilité da se baratè fora a livel cultural y se fà conësce a n publich plü ampl. Le Museum Ladin Ćiastel de Tor cun sënta a San Martin de Tor à metü a jì trami dui i concursc tl medemo tëmp, mo ai s’adressëia a artistes y artisć desfarënć y à tematiches desvalies.
Al Pest artistich de scoltöra Richard Agreiter 2013 pol ma tó pert artisć y artistes de scoltöra che laora y é aćiasà tl raiun dl Tirol storich (Nord-, Ost- y Südtirol, Trentin y les valades ladines de Badia, Gherdëna, Fascia, Fodom y Ampëz) y che à n lian particolar cun la cultura, la storia y les tradiziuns de chisc raiuns. Chësc concurs vëgn organisé en colauraziun cun l’artist Richard Agreiter; le pest é de 10.000 euro.
Ala Trienala Ladina 2013 pol fà para i artisć y les artistes che à süa residënza tles cin valades ladines dles Dolomites (Val Badia, Gherdëna, Fodom, Fascia y Anpezo), ti Grijuns y tl Friûl. Al po inće tó pert artisć y artistes che se sënt ladins y che à n lian particolar cun la cultura, la storia y les tradiziuns ladines. Chi che tol pert po se presentè cun n’opera realisada te na sort d’ert a plajëi. Les cin porsones che davagna podarà mëte fora süa opera te na mostra coletiva tl Museum Ladin Ćiastel de Tor.
La documentaziun damanada dala bandida dl concurs é da dè jö ćina ai 11 de forà dl 2013, dales 9.00.
La daurida dla mostra coletiva “Trienala Ladina 2013” y le conferimënt dl Pest artistich de scoltöra Richard Agreiter 2013 sarà ai 19 de messè dl 2013dales 18.00 tl Museum Ladin Ćiastel de Tor.
usp
