Economia | 14.01.2013 | 14:09

Jonta provinziela mpartësc la chëuta turistica do categuries

USP - La pert dla chëuta turistica che l tlient dëssa paië per judé a finanzië la lies turistiches unirà tëuta ite aldò dla categuria dl albierch. La Jonta provinziela à (NCUEI) ai 14 de jené dat pro trëi cuotes danter 0,70 y 1,30 euro per nuet. Aldò dla situazion spezifica de uni luech à i chemuns la puscibltà de auzé chësta cuotes.

La chëuta turistica dëssa unì tëuta ite te doi pertes. L cuntribut marketing di patrons de cësa dëssa resté sun basa ulentera sce la lies turistiches ne giata nia ite de manco che ti ani passei. La segonda pert ie la cuota che ti dëssa unì rateda su ai tlienc. La ndicazions aldò ie unides dates pro dala Jonta provinziela sun la basa de n cheder de lege provinziela.

La chëuta turistica messerà unì paieda a scumencé dal prim de jené 2014. I assessëures provinziei ie stai a una che la cuota dl tlient dëssa unì tëuta ite aldò dl priesc che vën paià per l albierc. Nsci iel unì metù dant trëi cuotes.

Tlienc che dorm pra fitamajons o cuatieres privac, sun luesc da paur o te n albierch da una o doi stëiles dëssa paië 0,70 euro per nuet. Chiche dorm te n albierch da trëi stëiles messerà paië 1,00 euro per nuet y a na nuet te n hotel da cater o cin stëiles dëssel unì ratà su 1,30 euro. Tla prima categuria dëssel aldò dl presidënt dla Provinzia vester feter 7,5 milion de nuetes afitedes, tla segonda 10,7 milion y tla terza 5,8 milion.

I Chemuns, che giapa la cumpetënza de tré ite chësta chëuta, possa aldò dla situazion spezifica auzé la cuotes nchin a 2,00 euro a nuet. Chësc possa unì fat sun la basa de n bënsté dla lia turistica. "L chemun ne muessa nia auzé la cuota per uni categuria unfat, a na maniera che l possa l adaté a si situazion tl luech" à spiegà l presidënt Luis Durnwalder tla cunferënza stampa do la senteda dla Jonta.

Chël che unirà trat ite cun la chëuta turistica resterà tl luech. 80% dla ntredes ie udù dant per la lia turistica dl luech y l 20% per l cunsorz turistich. Per l cunsorz turistich iel unì metù la sëida minima de 1,8 milion de nuetes afitedes. Te dut Südtirol iel me trëi cunsorc turistiches che ne arjonj nia chësta sëida: chël dl Ahrntal, chël de Mont Sëuc y dl Latemar-Rosengarten. "Chisc messerà se taché a n auter cunsorz turistich" à dit l presidënt dla Provinzia.

I chemuns arà sëuraprò al duvier de tré ite la chëuta, nce l cumpetënza de cuntrol aldò dla ndicazions fates ora danter la Provinzia y l Assoziazion di chemuns.
Na ezezion ie ududa dant per grupes de sculeies, jëuni nchin a 14 ani y per uties da mont ulache l muessa nia unì paià la cuota dl tlient.
La dezijion dla Jonta provinziela ie unida valuteda da si presidënt Durnwalder sciche n cumpromis che tën cont de duta la categuries nteressedes.

as

Galaria dales fotografies

Tl 2014 muesserà nce l tlient judé a finanzië la lies turistiches