Atualità
Jonta provinziela garantësc sustëni ai muciadives nchin de mei
USP – Te cater zentri dl Südtirol vëniel mo for cialà de 121 muciadives dal Africa dl nord. I aiuc dl Stat fova me udui dant nchin ala fin dl 2012 y mo do Nadel ie chisc unic slungëi de doi mënsc. La Jonta provinziela à (NCUEI) ai 14 de jené dat pro de garantì l sustëni nchin ala fin de mei.
Tl Südtirol iel la urganisazion Volontarius, Caritas y River Equipe che se cruzia de chëla persones che à messù mucé da si cësa tl Africa dl nord. L se trata de 121 muciadives che viv te cater zëntri, de chëi che doi ie a Bulsan, un a Vandoies y un a Maran.
Da pert dl Stat fovel me unì garantì l sustëni finanziel nchin ala fin dl 2012. Te tratatives danter la urganisazion de cura, la Cumissariat dl Guviern y l Karl Tragust, sciche referënt dla Provinzia, iel unì arjont n sustëni nchin ala fin de fauré. Per l albierch, l maië y la cura di muciadives paia l Stat per uni persona 35 euro a nuet (mpede 40 euro sciche tl 2012). Chëi muciadives che à n lëur, muessa judé pea a curì l custimënt.
Tl cumpaniamënt di muciadives vëniel sën dataprima cialà de ti judé a vester autonomes, scebën che l ie drët rie da abiné na luegia da viver. Ala fin de mei messerai ora di cater zëntri. "Nchin a ntlëuta à la Jonta provinziela garantì si sustëni finanziel n cajo che l Stat ne paia nia plu do la fin de fauré" à dit l presidënt Luis Durnwalder do la senteda dla Jonta.
I lëures per i muciadives ie unic fai te na culaburazion strënta danter Provinzia y Stat. L à laurà pea la repartizions provinzieles per la familia y l soziel, sanità, lëur, furmazion prufesciunela, lëures publics y la prutezion zevila. Da pert dl Stat la Cuestura y la Cumissariat dl Guviern.
as
