Atualità
Lege de ntergrazion: Provinzia chier pusciblteies
USP - La lege provinziela de ntergrazion ie stata n cumpromis danter n tratamënt valif per duc n cont de pruvedimënc soziei y l schivé che jënt da oradecà vënie me adalerch per via de chisc aiuc. Da pert dl Stat ne vëniel nia azetà la limitazion di 5 ani de lëur y residënza, nscì ie la Provinzia sfurzeda a crì do pusciblteies nueves.
Nchin a na dezijion definitiva, ie la lege nueva de ntegrazion per la provinzia de Bulsan mo n drova. L Guviern talian à dat inant la lege provinziela al Chëurt costituzionela ajache la limitazion di cin ani, y la defrënziazion danter chëi da tlo y da demez, dëssa vester anticostituzionela. A na maniera che fulestieres ne ruve nia adalerch per ne n aprufité di pruvedimënc soziei, ova la Provinzia metù na sëida de cin ani de lëur y residënza. Tla cunferënza stampa do la senteda dla Jonta (da NCUEI) dl 21 de jené, à l presidënt Durnwalder detlarà che ël nstës ova abù cuntat cun l cumisser europeich da ntlëuta Frits Bolkestein che ova azetà i 5 ani per schivé speculazions.
La strutures per jënt che resta plu giut amaleda, l sustëni ala families o per l cuatier ie pruvedimënc che tira l nteres de truep fulestieres. "Sce ne assan nia la graduatories spartides per l frabiché alesirà, ne ëssa chëi da tlo deguna puscibltà permez a jënt da demez che vif te pitli cuatieres, cun puech davani y truep mutons" à dit l presidënt dla Provinzia. Perchël adrova la situazion dl Südtirol n bon cumpromis.
La Jonta provinziela à nciarià i ufizies de cumpetënza de crì do prupostes per mantenì la lege de ntegrazion. L dëssa nce unì cialà do avisa la limitazions de tëmp te d'autra regions y paejes dl'Europa.
as
