Atualità
Jëuni possa fé pratica tla Provinzia
USP - Sculeies dla scoles autes, studënc de università y jëuni che à finà l studi giata nce chëst ann la puscibltà de fé nchin a trëi mënsc de pratica ti ufizies dl’Aministrazion provinziela. La cunescënza de plu rujenedes gëura la streda per pudëi fé esperienza de lëur nce tla scoles y ti ufizies destachei a Roma y a Bruxelles.
La dezijion de ciuna streda che i jëuni tol do la scoles o do l studi à na gran fazion sun si svilup persunel y sun si vita prufesciunela. Acioche chësta dezijion posse unì tëuta sun na fundamënta segura, pieta la Provinzia de Bulsan 200 lueges de pratica ulache i jëuni possa mparé a cunëscer de prima persona co che la ie tla realtà pratica dl lëur da uni di. „Cun a bona dezijion possa i jëuni schivé melcuntentëzes y dificulteies a abiné da lëur“ sorissea l assessëur Florian Mussner, cumpetënt per i jëuni ladins.
La sperienza de chëi che lëura bele ti ufizies dla Provinzia y si cunescënzes pratiches, vën dates inant te chëla che i jëuni possa lauré pea. Nscì à la Jonta provinziela à dat pro che l vënie nce paià ora velch. Sculeies dla scoles autes giapa 30 euro (brutto) al di y studënc de università o de tei che à bele finà l studi 40 euro (brutto) al di. A praticanc ti ufizies destachei a Roma y Bruxelles vëniel paià ora 50 euro (brutto) al di.
La stieres de pratica te chisc ufizies destachei vën sëurandates a studënc universiteres o neolaureei de dërt, politica, economia, scienzes sozieles o agrares. L vën tlo fat na graduatoria unica per grupes de rujeneda, ma sun la basa dla cunescënzes de rujeneda. Per fé pratica ti ufizies provinziei a Roma vëniel damandà de bona cunescënzes dl talian y dl tudësch. Per ruvé a Bruxelles muessen sëuraprò nce savëi l nglëisc o l franzëus. "Jëuni ladins che à mparà de plu rujenedes à dessegur de bona pusciblteies de giapé na luegia de pratica a Roma o Bruxelles" sorissea l assessëur ladin Mussner. Ala rujenedes vëniel nce dat pëis tl sëurandé la lueges de pratica tla scoles o scolines. Tlo vëniel damandà che i jëuni sebe la rujeneda de nseniamënt. Autramënter che pra i ufizies destachei, possa nce sculeies dla cuarta y cuinta tlas dla scoles autes fé pratica tla scoles y scolines. Chësc vel nce per duc i autri ufizies dla Provinzia.
La dumandes per fé pratica tla Provinzia possa unì mandedes ite nchin ai 28 de fauré al ufize de assunzion dl personal, streda Renon 13 a Bulsan. Sce la dumanda vën mandeda ite per posta iel da junté pro na copia dla cherta de identità. Chësc ne ie nia de bujën sce la dumanda vën mandeda ite tres posta eletronica zertificheda (PEC: personalaufnahme.assunzionipersonale@pec.prov.bz.it).
Nchin ala fin de merz uniral pona fat la graduatories aldò di ciamps de scola auta y de studi. Sculeies dla tlasses plu autes y studënc che ie bele plu giut scric ite al’università unirà tëuc dant. Priorità giapa chëi che à bele finà l studi y muessa fé na pratica de ublianza.
L tëmp de pratica scumëncia cun doi enes de prova. Ntan l tëmp vën i jëuni pona cumpaniei da n culaburadëur de esperienza che fej da tutor. N cajo che i se fajëssa mel, ie i jëuni nce curii dala assegurazion dl INAIL.
Nfurmazions plu avisa possen damandé pra l pont de nfurmazion (tel. 0471-412244) y pra Tanja Nicolussi Rossi (tel. 0471-412116).
as
