Atualità
Nchin ai 30 de jené dumandes per l ejam de ladin per nsenianc
USP – Per ruvé tla graduatories de nsenianc tla scoles ladines muessen avëi fat n ejam de ladin dedicà. L proscimo ejam per nsenianc sarà chësta ann ai 20 de merz, n possa se lascé nuté su nchin al plu tert n mierculdi ai 30 de jené.
La dumandes per fé l ejam de ladin per nsenianc de scola y scolina muessa uni fates pra la Ntendënza ladina a Bulsan. L formuler a posta ie da giapé tla direzions de scola y scolina o sun la plata web www.provinzia.bz.it/ntendenza-ladina. L ejam vën damandà te na pert scrita y a usc ulache la se trata de respuender a de plu dumandes daviertes de cuntenut pedagogich didatich.
N culaburazion cun l Istitut Ladin Micurà de Rü vëniel pità cursc de preparazion tl idiom de Gherdëina y dla Val Badia. L curs de preparazion te Sëlva vën tenì da Marco Forni y chël a San Martin de Tor da Werner Pescosta. Tramedoi cursc scumëncia ai 04 de fauré vën for tenii dala cater domesdì ala sies da sëira. La dates di cursc de preparazion te Sëlva y a S. Martin ie ai 04, 06, 13, 18, 20, 25 y 27 de fauré 2013.
as
