Atualità
Acurdanza per abiné plu stieres cun i partner soziei y n blog
USP – N ann dant che l ne fova udù danora à la Jonta provinziela purtà inant l plann acioche de plu jënt abine da lëur. Chësc ie stat de bujën ajache la crisa economica à ntant nce arjont l marcià dl lëur tl Südtirol. L plann ie (NCUEI) ai 25 de jené unì nvià via dal assessëur Roberto Bizzo deberieda cun i partner soziei. Leprò iel nce unì metù on line n blog interativ nuef.
Tl Südtirol dëssela mo jì miec che te majer pert dl’Europa, ma l prim iede te diesc ani ie la cuota dla persones zënza lëur ruveda sëura l cater percënt: „L aumënt de chëi zënza lëur ie na cunseguënza dla crisa y per nëus rejon de ti dé plu pëis ala politica dl marcià dl lëur“ à dit l assessëur Roberto Bizzo pra l’ancunteda cun i partner soziei. Tl cuncret uel chësc di che la Jonta provinziela ne aspieta nia che l plann de ocupazion de set ani fina n auter ann, ma che l ie bele śën unì scumencià a lauré ora l plann nuef.
“Nes on tëut dant de tré ite l plu jënt che se lascia te chësc lëur de preparazion. Chësc ie de bujën ajache la strutura demografica de nosta cumenanza se muda y perchël ne adurvons nia me partner soziei, ma na lianza dla generazions” à dit l assessëur provinziel. Nchin de juni vëniel purtà inant na lingia de scumenciadives per purté l plann dl’ocupazion sun na basa lergia.
Ntant iel bele unì nvià via n elemënt de partezipazion: tl blog interativ www.arbeitspakt.it possa duc i nteressei rujené pea. Tlo possel unì dat te prupostes, ideies y critiches sun i argumënc scola, jëuni, ëiles o lauranc penalisei. “Nchin ai 22 de merz uniral tëut su i inputs dl blog che unirà pona purtei te workshop de defrënta grupes de lëur, che se ancunterà ai 19 de auril” à dit Helumth Sinn, diretëut dla repartizion provinziela per l lëur. Te chisc workshop uniral trat adum dla prupostes y i ciamps d’azion de majera mpurtanza per pité nsci na basa ala cumiscion de cumpetënza che laurerà ora na pruposta per n plann de co abiné da lëur. Nchin a mez juni dëssa chësta pruposta unì purteda dant ala Jonta provinziela.
Pra la prejentazion dl program de lëur iel nce unì fat al savëi la zifres nueves dl marcià dl lëur. Ntan l 2012 iel unì cumpedà 11.108 persones zënza lëur, a chësta maniera ie la cuota ruveda al 4,3 percënt. Tl medemo tëmp ie la cuota di lauranc sot a patron me cresciuda dl 0,3 percënt, chësc ie l mënder aumënt do l 1998.
as
Galaria dales fotografies
