Atualità

Desvalì | 04.02.2013 | 14:43

Ideies nueves per l sustëni provinziel al cuatier

USP - Cun na lingia de pruvedimënc uel la Jonta provinziela miuré l sustëni acioche i zitadins posse ruvé pra n si cuatier. La prupostes che ie unides tratedes (NCUEI) ai 04 de fauré reverda dantaprima n aiut spezifich per chiche à nstës sparanià velch per l cuatier y aiuc per ressané cuatieres te vedla cëses. I assessëures à nce rujenà de n aiut spezifich per curì l dann gaujà dala smueia de Badia.

"Chëi che ie nstës boni de mëter sun na pert n pue' de scioldi per l cuatier dëssa giapé dala Provinzia la medema soma che i à sparanià" à dit l presidënt dla Provinzia Luis Durnwalder te cunferënza stampa do la sënteda dla Jonta. L se trata tlo de na idea che vëja nce dant de pudëi mpresté su scioldi a miëur priesc y de giapé cuntribuc provinziei. Te chisc pruvedimënc nueves dëssa zapé ite l Pensplan te chëla che l pieta de miëura cundizions a chiche à bele paià ite per na pension sëuraprò y che ulëssa adurvé na pert de chisc scioldi per l cuatier.

I aiuc nueves che la Jonta provinziela uel mëter a jì ne reveda nia me cuatieres defin nueves, ma nce l ressanamënt de cuatieres. Per nvestizions de chësta sort à l Stat udù dant che l possa unì trat ju chëutes per diesc ani. "Ulessan che la Provinzia paie ora chësta reduzion dla chëutes te un n iede, zënza che l ie de bujën de aspite diesc ani" à dit l presidënt dla Provinzia. Tla Jonta provinziela iel unì rujenà de cuntribuc per ressanamënc energetics, per baraté ora pertes de asbest nce da pert de privac y sustenì i lëures per ruvé permez a raions da frabiché, te chëla che unissa giaurì l fond de rotazion a cater ani mpede me a trëi.

La mesura di cuntribuc provinziei per l cuatier dëssa se urienté ala detlarazion de avëi y davani EVEE/DURP.

La prupostes che ie unides metudes su mëisa muessa śën unì cuntroledes da pont de ududa tecnich. I respunsabli dl fond de pension Pensplan unirà nviëi a na senteda dla Jonta provinziela per nvië via na culaburazion te chësc ciamp de sustëni.