Atualità
Jonta provinziela mët na sëida ala smueia de Badia
USP – Al raion a Badia che de dezëmber ie unì tucà dala gran smueia, ti à Jonta provinziela (NCUEI) ai 11 de fauré metù na sëida. Chësta sëida ie de bujën acioche la jënt tucheda posse giapé aiuc dala man publica.
L ie stata la prima senteda dla Jonta provinziela te si cumposizion nueva, cun l assessëur Elmar Pichler Rolle, te chëla che l ie unì metù na sëida al raion dla smueia che fova unida ju dan Nadel a Badia. Cun chësc pruvedimënt possel unì dat aiuc staordineres: „Da una pert possel unì semendrì la chëutes da paië al Stat, dal’autra pert à nce la Provinzia la puscibltà de dé de majeri cuntribuc per frabiché, per l lëur da paur o ti bosc“ à dit l presidënt dla Provinzia Luis Durnwalder. Sëuraprò ai cuntribuc (che possa arjonjer nce 100 percënt di custimënc) vel la sëida dl raion nce per reduzions che vel zënza per cuatieres: „zënza vëniel me dat ora cuntribuc a cuatieres nchin a 110 metri cuadrac, te raions tuchei da na catastrofa pudons judé a finanzië la medema grandëza che fova dant“ à dit Durnwalder.
La smueia de Badia fova unida ju ai 13 de dezëmber y ova trat pea 40 hectar de grunt, desdrujan trëi cëses. La smueia à plu dis manacià de strupé su l ruf. Chësc ne ie nia unì a se l dé ajache n à riesc avisà demez l’ega cun roles. Persones ne ie nia unides tuchedes dala smueia ajache feter 40 persones a messù mucé ora de cësa. Davia che la smueia ne se à ntan l ultimo mëns nia plu muet, possa la families chisc dis inò jì de reviers te si cëses.
as
