Atualità

Politica | 11.02.2013 | 15:17

Model de sparani per n cuatier: Jonta provinziela anconta Pensplan

USP – Se stizan sun l fond de pension sëuraprò uel la Jonta provinziela mëter su n model de sparani per ruvé pra n cuatier. Co che pudëssa unì a cialé ora chësc model, à la Jonta provinziela (NCUEI) ai 11 de fauré tratà deberieda cun i respunsabl dl Pensplan. L presidënt dla Provinzia Durnwalder à cunedì che ntan la proscima trëi o cater enes uelen purté dant na pruposta cuncreta.

I respunsabli dl Pensplan cun si presidënt Gottfried Tappeiner, cumpaniei dal’assessëura regiunela Martha Stocker ie stati tla senteda dla Jonta provinziela per cunsultazions sun pusciblteies de n sparani per l cuatier, se stizan sun l fond de pension sëuraprò. „Ulon ti judé ai jëuni a fé su capital per pudëi se cumpré n cuatier“ à dit l presidënt dla Provinzia. Chisc scioldi dëssa unì sparaniei tl fond de pension sëuraprò y la Provinzia judëssa pea te chëla che la mprestëssa capital a n bon fit y che la dajëssa n cajo nce de majeri cuntribuc. L capital che ie de bujën dëssa, sciche l ie unì tratà tl’ancunteda, unì dala Provinzia. N rejona de 50 milion de euro, de ndut 250 milion che vën dala Region y che vën metui tla „Südtirol Finance AG“. Da pert de Pensplan pudëssel unì metù 20 percënt de si avëi te chësc ciamp, à dit Durnwalder. Tl’ancunteda iel nce unì rujenà dla cundizions aldò de chëles che Pensplan fossa despost a sustenì l sparani per n cuatier. La se trata tlo di tëmps, dla maniera co che l capital dëssa unì paià de reviers y ce pert che sëurantol chëi che sparania y che giapa n credit.

Sun la basa de chël che l ie unì rujenà, saral śën i respunsabli dl Pensplan a lauré ora de plu modiei y ejëmpli de conc. „Chisc possa unì fai sun la basa de mo d’autra cunsultazions, ma speron de ruvé a na soluzion te tëmp de trëi o cater enes“ à dit l presidënt dla Provinzia. Chësc ie de bujën per pudëi mandé inant pernan che la va na pruposta de mudazion ala lege dl frabiché al Cunsëi provinziel. „Se on tëut dant de seguré l model de sparani mo ntan chësta legislatura tres lege“ à dit Durnwalder.