Atualità
Bedaia mundiela per Mölgg, auguresc da Durnwalder y Mussner
USP – Manfred Mölgg à venciù la bedaia de bront de slalom lerch pra i campionac dl mond a Schladming. L presidënt dla Provinzia Luis Durnwalder y l assessëur ladin Florian Mussner fej auguresc al atlet de Al Plan de Mareo per chësc gran suzes (da NCUEI) de n vënderdi 15 de fauré.
La bedaia de bront a Schladming ie bele l terzo majer suzes de Manfred Mölgg pra campionac dl mond de schi. Dl 2007 ovel venciù arjënt tl slalom de Are, dan doi ani l bront a Garmisch. Si bedaia da chëst iede, ie la prima tl slalom lerch. „Manfred à cumbatù dassënn y ie stat bon de tenì permez sun n purtoi dlacià y rie da furné, si suzes fej gran unëur ala populazion de Südtirol“ sorissea l presidënt dla Provinzia y assessëur al sport Durnwalder. Tla segonda mance à Manfred manacià de tumé y ie pona japé dla Planai, mo stat bon de tré ite tëmp per pudëi zapé sun l terzo scialier mundiel.I auguresc da pert dla Jonta provinziela vën nce dal assessëur ladin: „Chësta terza bedaia de Mölgg porta gran legrëza ala populazion di luesc ladins. Manfred, cun si maniera de vester da plajëi ie n ejëmpl per truep de nosc jëuni“, nsci Florian Mussner che lecorda nce di tëmps ulache Mölgg à messù cumbater y che śën iel unì premià cun la bedaia.
L suzes dl atlet ladin de 31 ani ne porta nia me legrëza y unëur, la juda nce pro a aumenté l nteres per l sport dai schi che ie la fundamënta dl turism y dl bënsté tla valedes ladines.
as
