Trafich | 25.02.2013 | 14:15

Jonta provinziela: furnadoia dla Plose dëssa muever dala stazion dla ferata

USP – Sce l vën fat na furnadoia da Persenon nchin sun la Plose ie la Jonta provinziela dla minonga che chësta dëssa muever pra la stazion dla ferata. Davia che l se trata de n proiet pilot per taché adum ferata y furnadoia, à la Jonta provinziela (NCUEI) ai 25 de fauré nce dat pro de dé n finanziamënt nchin al 75 percënt.

"Te chëla che l vën fat l ressanamënt dla stazion dla ferata a Persenon, dëssel nce unì fat la stazion dla furnadoia" à dit l presidënt dla Provinzia riesc do la senteda dla Jonta provinziela. L presidënt à fat referimënt al ejëmpl dla stazion de Percha y Plan de Corones. Tl'acurdanza cun la Rë dla scines RFI iel bele udù dant che la Provinzia posse se nuzé tla puscion ntëur la stazion de Persenon per fé lueges dai auti. Chëstes dëssa unì metudes a desposizion di pendolares y te n daunì nce per i chëi che furnea sun la Plose. "Sce l vën bele fat na furnadoia nueva, dëssela muever dala ferata a na maniera che l ne ie nia de bujën de tò mo na curiera danterite " à dit Durnwalder.

L custimënt de n tel proiet pilot dëssa unì curì dala Provinzia, dal Chemun y dala sozietà privata dla furnadoia. Te chësc mumënt ie unì sciazà n custimënt de 35 milion de euro. Me per la furnadoia iel udù dant da 18 a 22 milion de euro. Davia che l culegamënt dala ferata ai purtoies dai schi à n carater drët inuvatif y schiva l muvimënt sun streda, ie i assessëures provinziei stai a una che la pert che reverda la furnadoia y si stazions, posse unì finanzieda nchin al 75 percënt dala Provinzia.

as

Galaria dales fotografies

Na idea inuvativa: na furnadoia dëssa schivé trafich tres la zità de Persenon.