Atualità
Scumencià l cunvëni E.CH.I. per n barat de metodologies etnografiches
USP - Tl palaz provinziel Widmann a Bulsan à (NCUEI DOMESDI) ai prim de merz scumencià l cunvëni de doi dis sun metodologies etnografiches per nrescì y fé al savëi l patrimone culturel nia materiel. L cunvëni ie metù a jì dal Museum Ladin y dal’Assoziazion etnografica dl Südtirol EVAA ie nasciù dal proiet transnaziunel E.CH.I. (ethnografies talianes-svizeres) te chël che l Museum Ladin se à dat ju cun l patrimone nia materiel, tradizions y usanzes de Gherdëina. L cunvëni va inant nchin sada ai doi de merz da mesdì.
Ntan l cunvëni iel 12 reladëures taliani y da oradecà che da n si cuntribut ala defrënta manieres de tò su, documenté y dé inant l patrimone culturel nia materiel. Te si paroles de salut à l assessëur ladin Florian Mussner metù a cuer la mpurtanza y l valor de se de ju cun l'arpejon culturela nia materiela che destol n pue' dala tendënza de ti dé massa pëis a valores materiei tla descuscion publica. "Tla globalisazion nes desferenzieia valores nia materiei y chësta maniera de pensé nes da richëza" à dit l assessëur ladin.
Ntan l cunvëni uniral nce dat respostes a coche i museums possa tò su y dé inant l patrimone culturel nia materiel. "Chësc ie per mendranzes de rujeneda y per raions de sëida una na dla funzions de basa" à sorissà l diretëur dl Museum Ladin Stefan Planker. De chësc viers vëniel vënderdi domesdì y sada danmesdì rujenà de strategies y bona pratiches.
Pert finela dl cunvëni a Bulsan, sada da mesdì, sarà i resultac y l'esperienza de Emanuel Valentin, che sun ncëria dl Museum Ladin se à dat ju cun tradizions y usanzes te Gherdëina. Tl cheder dl proiet E.CH.I à Valentin nstës fat nrescida antropologica y nventarisazion dl patrimone culturel nia materiel de Gherdëina.
---
De plu nfurmazion: Proiet E.CH.I per nrescì y dé inant l patrimone culturel nia materiel de Gherdëina
www.echi-interreg.eu
www.museumladin.it
www.ev-aa.org
as
