Atualità
Sculeies dla mesanes ladines deberieda sun la dlacia de Alie
USP – La scuadra de Fascia à venciù la cuarta edizion dl turnoi de hockey per sculeies dla mesanes ladines. L’ancunteda sportiva danter la cin valedes ladines dla Dolomites a Alie (Alleghe) à purtà pro a miuré i cuntac danter la scoles y a n mparé a se cunëscer miec danter sculeies.
N vënderdi ai 7 de merz à uni scuadra juga conta l'autra y ala fin se à i sculeies del Fascia davanià l titul dan a chëi de Ampëz y de Gherdëina, che ova venciù l ann passà. La scuadra de Badia ie deventeda cuarta y à mpo pudù tenì pea cun la autres che à na majera tradizion. "L me à plajù dassënn che i jëuni se ebe cunfruntà, se cumpurtan cun spirt sportif y zënza stritamënc. Chësc lascia bën speré che l turnoi ebe n bon daunì", dij l ntendënt Roland Verra.
L ie bel tradizion che la scuadres de hockey dla scoles mesanes dla valedes ladines se anconta n iede al ann for te n autra valeda per n turnoi ladin, tl sëni dla culaburazion y tl spirt dla cumpetizion sportiva y dla fairness.
La scumenciadiva fova mueta da l ntendënt ladin Verra y ie śën bele n avenimënt segur tl calënder dl sport per la scoles de nosta valedes. L trofeo interladin de hockey ie na copa che vën data inant uni ann ala scuadra che vënc.
La urganisazion dl turnoi ie dl servisc sport scolastich ladin cun a cë Brigitte Pedevilla y di cuordinadëures sportives dla autra valedes ladines. Chëst ann ti ala tucà al ufize scolastich dla Provinzia de Belun che à metù a jì l turnoi tl stadium dala dlacia de Alie.
usp
