Atualità
Prim 100 dis dla Rë zivica per ladin
USP – Ai 5 de dezëmber fovel unì giaurì la Rë zivica dla Provinzia de Bulsan nce tla rujeneda ladina. La bilanz di prim 100 dis (ai 15 de merz) mostra su che l ie nteres per l portal de nfurmazion tla rujeneda ladina y che la populazion ladina a scumencià a se usé dl servisc de nutizies, di servijes dl’aministrazion publica y dla banches dac. Drët vijitedes ie nce la previjions meteo tla rujeneda ladina.
Ti prim 100 dis iel unì cialà 8.638 iedesc ala Rë zivica dla Provinzia de Bulsan. Tenian cont che la jënt fova useda a ti cialé ala medema plates tl'autra rujenedes ie i respunsabli dla Provinzia cuntënc de chësc prim bilanz. "Sun la rë zivica vëniel pità servijes, nfurmazion y nutizies te nosta rujeneda, śën vala de se usé a adurvé mo de plu chësta puscibltà tres internet" mët a cuer l assessëur ladin Florian Mussner.
Aldò dla statistiches iel nchinamò unì cialà l plu suvënz ala plata prinzipela www.provinzia.bz.it, ai servijes per categuries y ala nutizies d'atualità. Truep nteres iel nce unì mustrà per i cuntac de istituzions y ufizies, formuleres per fé dumandes y al calënder dla manifestazions.
La Rë zivica dla Provinzia ie unida anjenieda tla rujeneda ladina per arjonjer doi fins prinzipei: chël de pité nfurmazion ala populazion ladina te si rujeneda y dal'autra pert de posiziuné la mendranza ladina sun l portal internet publich plu vijità tl Südtirol. "On udù che chësc mesun de nfurmazion inuvatif y zënza papier vën nuzà y perchël sons cuntënc cun i prim resultac" dij Mussner. Davia che l ladin ie na rujeneda de mendranza ne possen nia se aspité de grandiscima cumpëides de vijitadëures. Ma de mpurtanza, nsci l assessëur ladin, ie che la rujeneda ladina vën te chësc cajo metuda ala pèr cun l'autra rujenedes, nce sce nosta mendranza fej me ora na pitla pert dla populazion provinziela.
N bon scumenciamënt à nce abù l servisc de nfurmazion meteo tla rujeneda ladina. La plata www.provinzia.bz.it/meteo-ladin ie ntan i prim 100 dis unida vijiteda 6.100 iedesc. Truep nteres iel stat per la previjions meteo per dut l raion dl Südtirol ma nce per la previjions ti raions. Drët bën ie nce unì nuzà l servisc de radar dala plueia, dla cameres web y di valores dala singula stazions dal tëmp. De chëstes ne n iel nce una te Sëlva, a San Martin de Tor, sun Piz La Ila y sun Piz Pisciadù. Tres la cameres web possen danter auter nce udëi i raions dl Jëuf de Frea y dla Mont de Sëuc.
L'adresses inernet
www.provinzia.bz.it
www.provinzia.bz.it/m/la (verscion per l telefonn)
www.provinzia.bz.it/meteo-ladin
as
Galaria dales fotografies
