Atualità
Bedaia mundiela per Carolina Kostner: auguresc da Durnwalder y Mussner
USP – Pra i campiunac dl mond de jadinè artistich à Carolina Kostner venciù la bedaia d’arjënt. Per chësc suzes straurdiner ti manda l presidënt dla Provinzia Luis Durnwalder y l assessëur ladin Florian Mussner i miëur auguresc: „Cun l titul da vizecampiunëssa dl mond à Carolina Kostner inò demustrà si gran capaziteies, purtan unëur al Südtirol y ala valedes ladines“.
Tla nuet da sada a dumënia iel pra i campiunac dl mond a London tl Canada unì garejà la pert finela dla garejeda dl’ëiles. Carolina à tò arjont la terza miëura valutazion y ie nsci stata bona de mantenì la segonda posizion che la ova bele do l program de ublianza cun me puec ponc de plu dla terza. La bedaia d’or ie jita a Yu-na Kim dla Corea, l arjënt a Carolina Kostner y l bront a Mao Asada dl Japan. Dan scumencé la Kür à Carolina giapà n gran sanch de nes y à ntan garejeda perdù sanch sun dlacia. „Me ei daudà dan l publich y la giuria. Ma dal’autra pert me dal sudesfazion che son mopomo stata bona de fé mi garejeda, chësc me dà gran crëta per jì inant“ à dit Carolina Kostner.
L’atleta de Urtijëi à venciù si cuinta bedaia mundiela. „Carolina Kostner nes fej gran unëur y porta for inò l inuem dl Südtirol danter milions de pasciunei dl jadiné artistich“ sorissea l presidënt dla Provinzia Luis Durnwalder che à la cumpetënza dl sport tla Jonta provinziela. L publich ie bele n pue’ usà ai suzesc dla jëuna de 26 ani, ma per ëila se fej for inò su prescions da chëi che se aspieta y pertënd nce resultac a livel plu aut. L avëi tenì permez ala prescions ti dà, aldò dl presidënt dla Provinzia, mo n majer valor a chësta si cuinta bedaia mundiela“
Pra i campionac dl mond de jadiné artistich ova Carolina Kostner dl 2005 venciù la bedaia de bront, dl 2008 arjënt y dl 2011 inò bront. L ann passà ie l atleta de Urtijëi deventeda campionëssa dl mond. „L suzes de Carolina fej gran legrëza y porta unëur a duta la populazion ladina“ sorissea l assessëur ladin Florian Mussner fajan nce referimënt al titul de campionëssa europea da chëst ann.
Ala fin de jené à Carolina a Zagreb venciù si cuinta bedaia dl’or pra campiunac dl’Europa. Cun cin bedaies mundieles y cin iedesc campionëssa europea te na disciplina sportiva cun damat na gran cuncurënza lascia Carolina n gran sëni tla storia dl sport. „Carolina à mustrà che cun ulentà y pascion possen ruvé dassënn inant. Si streda sportiva ala scumencià a cësa, te n luech da mont, ulache l ti ie unì pità la cundizions per mëter la fundamënta a na cariera straurdinera“ nsci l assessëur ladin.
as
