Atualità

Frabiché | 19.03.2013 | 08:46

Stredes de Rina, Pidro y da Pruca ite sun l program 2013 (cun audio)

USP - L program di lëures sun la stredes che la Jonta provinziela à (INIER) dat pro per l ann 2013 vëija dant cater de majeri lëures tla valedes ladines: l terzo toch dla streda de Rina, la streda de Pidro, l segondo puent sun l jëuf de Sela y slargë la streda de Pruca ite. Ntant vëniel nce purtà inant la proietazion dla ntreda nueva per la Val Badia a San Laurënz.

Per i lëures sun la stredes dl Südtirol ntan l 2013 à la Jonta provinziela ai 18 de merz dat pro n program che vëija danora n custimënt de passa 82 milion de euro. Danter chisc lëures nen iel cater ti luesc ladins. "Per la valedes ladines ons chëst ann prugramà de finé i ultimi lëures che se an tëut dant per chësta legislatura" spiega l assessëur provinziel Florian Mussner cun sudesfazion de pudëi mantenì tant che fova unì mpermetù.

L terzo lot dla streda de Rina ie l majer lëur da chëst ann tla valedes ladines. Do che i prim doi toc ie bele finei, uniral laurà sun i ultimi 2.100 metri per ruvé tl luech de Rina. I lëures reverda l slargë la streda y tò demez la majera pendënzes. Te de plu lueges ie la streda tan strënta che i auti stënta a despassé via. Chësc ie mo piec canche n anconta de majeri mesuns sciche camions o curieres. Per l terzo lot dla streda de Rina à l Assessorat ai lëures publics udù dant n custimënt de 7.341.000 euro. L scumenciamënt di lëures ie udù dant de mei.

Da Pidro a La Val uniral slargià la streda y miurà la raides. L ntervënt sun na lunghëza de 425 metri nchin ala frazion Lé à l fin de garantì plu segurëza a chëi che va a pe, perchël uniral nce fat n tretuar y n sotpassaje. Tl proiet dla streda a Pidro iel nce udù dant de zaré ju y fé su da nuef n puent de 18 metri. L custimënt udù dant tl program di lëures ie de 2.072.000 euro. La repartizion per la nfrastrutures à udù dant de scumencé cun i lëures de juni.

Sun Jëuf de Sela, nia dalonc dala cava, oven bele d'autonn scumencià a fé da nuef n puent. Chësc lëur unirà finà de auril. L se trata tlo de n proiet per 397.000 euro che fej pert dl program de ressanamënt di puenc che ne garantësc nia plu la segurëza ai mesuns plu pesoc. L puent n cuestion ie pra l chilometer 26,8. N auter puent che ie me 200 metri dessëura, fova unì fat da nuef dan doi ani.

Trëi chilometri dedite da Pruca, ulache pea ora la streda per Solaion, fovel bel unì fat doi puenc nueves y slargià la streda. Da iló demez uniral chësta ann laurà sun na lunghëza de feter 200 metri per slargë la streda y garantì a chësta maniera plu segurëza. Per seguré l rone uniral fat da nuef l mur de sustëni cun micropei. Dantaldut tla raida stënta doi majeri mesuns dassënn a passé via y chësc cumporta for inò dificulteies de viabltà. Aldò dla proietazion se tratela tlo de na nvestizion de 766.000 euro. I lëures unirà scric ora d'ansciuda a na maniera de pudëi frabiché d'instà.

N majer lëur per arjonjer la valedes ladines vën proietà a San Laurënz: la ntreda nueva tla Val Badia. Tlo an bele fat la verscion esecutiva dl proiet y śën vëniel mo purtà inant l iter tecnich. "On udù dant de scumencé mo chëst ann i lëures per la ntreda nueva tla Val Badia. Davia che l ie n majer lëur, depëndel śën dantaldut dala previjions finanzieres per l 2014" spiega l assessëur Florian Mussner. D'ansciuda iel tla Val Badia udù dant na sëira de nfurmazion sun la ntreda nueva a San Laurënz.