Economia | 22.03.2013 | 11:36

Gran nteres al sustëni speziel per lifc dai schi

USP – La rë de servijes tl luech ne reverda nia me l cumerz. Aldò dl assessëur Widmann iel de mpurtanza che i luesc ebe nce nfrastrutures turistiches atratives. Per chësta rejon iel unì nvià via n sustëni speziel per i lifc dai schi ti luesc. Nchiamò iel ruvà ite 15 dumandes.

Ala fin de dezëmber à la Jonta provinziela dat pro l sustëni speziel. La rejon che ie dovia ie drët scëmpla: "Sce ne ti judon nia ai pitli lifc dai schi ti luesc, puderai me jì inant nchin che la mascins va mo" spiega Widmann. Feter degun patron de n pitl lift te n luech ne à l muet de fé da nuef si lift, de anjenië n mplant da fé nëif o pruvedimënc de segurëza, o de cumpré n giat dala nëif. Chësta cundizions ne ti pieta nia de bona pruspetives ai pitli lifc ti luesc.

N uel schivé che i pitli lifc muessa śaré. "Da una pert à i pitli lifc na gran mpurtanza da pont de ududa turistich, ajache i ti dà plu valor ai luesc. Da pont de ududa economich y soziel possa la jënt dl luech y i fulestieres mparé a jì cun i schi dan porta. Chësc ie de gran utl acioche l vënie do jënt che va cun i schi y che va pona nce ti majeri raions dai schi" spiega Widmann.

De chësc valor se rënd sambën nce cont i patrons di lifc ti luesc. Dal scumenciamënt dl ann iel bele ruvà ite 15 dumandes per n sustëni, che ie n relazion a 16 di mëndri raions dai schi, na gran cumpëida. La dumandes ie unides fates sun la basa de na soma de nvestizion de 4,2 milion de euro.

as

Galaria dales fotografies

I pitli lifc dai schi ti luesc ie de valor acioche l vënie do jënt che va cun i schi (foto USP).