Atualità
27 nsenianc anjeniei per la graduatories ladines
USP - Per pudëi nsenië tla scoles ladines muessen avëi fat n ejam de ladin per nsenianc. Di 30 candidac che se à l’ena passeda prejentà al ejam de ladin a Urtijëi ie passei l 90 percënt. Ëi possa sën fé dumanda de ruvé tla graduatories di nsenianc dla scoles y scolines ladines.
Chëst ann se à prejentà 30 candidac al ejam de ladin per nsenianc. Tla pert scrita ne n iel per l prim iede nia unì fat na traduzion. Chëst iede à i candidac messù respuender a dumandes daviertes de cuntenut pedagogich. I criteries de valutazion de chësta forma nueva de ejam fova la cumpetënza de rujeneda n cont de traté la tematiches damandedes, nia fé fai de rujeneda, la terminologia scolastica, gramatica, ortografia, costruzion dl pensier y sintassa.
Tla pert a usc iel unì damandà dla nasciuda y svilup dla rujeneda ladina, dla storia di Ladins dla Dolomites, dla geografia dla valedes ladines, la normes che reverda la mendranza ladina, l sistem scolastich y la cultura ladina.
27 nsenianc ie passei chësc ejam de ladin che ie damandà per pudëi se lascé nuté su sun la graduatories provinzieles per i nsenianc dla scoles ladines. Cun l ejam de ladin vën la stieres da maester tla scolines y scoles ladines resservedes defin a nsenianc de rujeneda ladina. Duc i nsenianc muessa avëi l trilinguism, ma i ladins vën tëui dant.
"Davia che la cumiscion de ejam se à damandà de spartì la gran cumpëida de candidac sun doi ejams al ann, uniral bonamënter d'autonn inò metù a jì n tel ejam cun danora i cursc de preparazion" spiega l ntendënt Roland Verra.
as
