Atualità
Plü lerch ales Dolomites tla Ćiasa dl Parch Natural a Al Plan
USP – Le comun de Mareo é te döt le Südtirol le comun cun la majera spersa reconesciüda sciöche patrimone mondial UNESCO. Tla Ćiasa dl Parch Natural a Al Plan déssel inće gnì presentè le patrimone mondial aladô. Pro na vijita a Al Plan ti à l’assessur Elmar Pichler Rolle lascè alsavëi al ombolt Albert Palfrader che la proietaziun por ingrandì la Ćiasa dl Parch Natural é bele a bun punt y che la Provinzia fajarà ćiamò en chësc ann na majera plaza dai auti por la Ćiasa dl Parch Natural.
L'Ofize Parcs naturai é tl laûr da laurè fora en colaboraziun cun la Repartiziun provinziala Frabiches y Sorvisc tecnich le proiet d'ampliamënt dla Ćiasa dl Parch Natural Fanes-Senes-Braies a Al Plan de Mareo, n sëgn de prestisc, por presentè le miù che ara va les Dolomites detlarades dal'Unesco patrimone natural mondial. L'assessur provinzial Elmar Pichler Rolle à cuntè tratan n surapost cun l'ombolt de Mareo, Albert Palfrader, sciöche la situaziun ćiara fora. "I ùn debojëgn de de plü sperses por podëi presentè le miù che ara va les Dolomites y garantì les lercs adatades por les mostres ambulantes, che cherdarà adalerch le gran publich tla Ćiasa dl Parch Natural", à sotrissé Pichler Rolle. L'ombolt Palfrader à confermè che le numer di turisć internazionai é chersciü dal inserimënt dles Dolomites sön la lista dl'Unesco.
Al momënt é l'Assessorat por la natöra, la contrada y le svilup dl teritore tl laûr da ciafè na soluziun por la manćianza de lercs "por podëi gestì a na manira profescionala y mirada l'ativité de sensibilisaziun y informaziun dl vijitadù", à recordè Pichler Rolle. Le stüde dl 2012 por la Ćiasa dl Parch Natural a Al Plan é gnü elaborè danü cun na reduziun di preventifs di cosć. "Te chisc tëmps é i mesi finanziars limità y porchël ti portarài dant ala Junta provinziala n plann de de plü agn por arjunje te de plü vari na promoziun adatada de düć i posć colià ales Dolomites patrimone dl'Unesco", à splighé l'assessur.
N ejëmpl concret: por le problem dl parchè pro la Ćiasa dl Parch Natural a Al Plan saràl tosc dan man na soluziun por mirit dl'acuisiziun de na spersa dlungia l'entrada prinzipala dla strotöra, sön chëra che al gnarà 24 posć da lascè l'auto. Le Comun de Mareo é tl laûr da arjigné ca i passaji tecnich-aministratifs, l'Assessorat provinzial por la natöra, la contrada y le svilup dl teritore mët a desposiziun 100mile euro y chël por i laûrs publics realisarà i laûrs chësc ann.
USP
