Trafich | 08.04.2013 | 14:22

L metrobus da Kaltern a Bulsan vën fat

USP – Ntan la senteda da (NCUEI) ai 08 de auril à la Jonta provinziela valutà n studi de fatibltà per n metrobus tl Überetsch per miuré l trasport publich danter Kaltern y Bulsan. I assessëures ie stai a una che l dëssa unì realisà chësc mesun de trasport che costa scialdi de manco che n tram y che se lascia nce realisé plu aslune.

Per ressolver l problem dla stredes mpifedes danter Kaltern y Bulsan, da duman canche la jënt va a lauré te zità y da sëira, uel la Jonta provinziela na soluzion che se lascia realisé te puech tëmp. "Mpede n tram che unissa a custé da 200 a 280 milion de euro, sons stai a una per l metrobus che unirà a custé ntëur 20 milion de euro" à detlarà l presidënt dla Provinzia Durnwalder riesc do la senteda dla Jonta. Ulache l ie de bujën dëssel unì resservà na corsia de streda de prezedënza, semafri y stazions modernes ulache ruva nce permez persones cun handicap. Danter cumpré la curieres "metrobus" y la realisazion di pruvedimënc sun streda vëniel fat cont cun doi-trëi ani de lëur. 

Per cumpré la prima sies curieres-metro che respetea l ambient, iel bele unì scrit ora n cuncors. L finanziamënt unirà curì cun i 2 milion che fova unic metui tl bilanz provinziel 2013. Per resservé na corsia sun streda à l Chemun de Bulsan bele la preparazion tecnica per la pert che reverda la zità nchin tl raion Firmian. Dl toch nchin pra la Me-Bo se cruzia la Provinzia. Do la dezijion dla Jonta provinziela de mëter a jì l metrobus, uniral dat la ncëria per proieté na stazion a Kaltern y n sotpassaje al'autëza dl Pillhof.

Per pudëi finé la realisazion de chësc mesun de trasport spera l presidënt Durnwalder che i chemuns mëte nce a desposizion i grunc . Per l finanziamënt fej la Jonta provinziela cont cun n sustëni dal pert dla Union Europea y de adurvé nce velch di mesuns udui dant per l ciamp de inuvazion.

as

Galaria dales fotografies

Inuvazion tl trasport publich: n metrobus da Kaltern a Bulsan