Scora / Cultura | 09.04.2013 | 10:10

Record de iscrizions tla scoles autes ladines (cun audio)

USP – Da 25 ani ne iel nia stat tan truepa iscrizions tla scoles autes ladines sciche per l ann de scola che vën. Tla scoles autes y prufescioneles di luesc ladins se a scrit ite 11 percënt de plu jëunes y jëuni permez al ann passà. Dala scolines nchin ala scoles autes paritetiches ladines saral tl ann de scola 2013/14 de ndut 3.278 sculeies.

Aldò dl'iscrizions per l ann de scola che vën saral d'autonn 534 jëunes y jëuni che va a na scola auta o prufescionela paritetica ladina. Ntan l ultimo chert de secul ne iel mo mei unì arjont tan na gran cumpëida de iscrizions. "La truepa iscrizions mostra l nteres de nosc jëuni per l sistem scolastich ladin ulache i possa mparé de plu rujenedes a n bon livel. La families à udù ite che la rujenedes ie na fundamënta mpurtanta per ruvé inant tl mond dl lëur" sorissea l assessëur Florian Mussner.
Permez al ann passà iel tla scoles autes y prufescioneles ladines 52 iscrizions de plu (+ 10,8%). Chësc aumënt ie stat plutosc valif danter la defrënta scoles. Tla scoles autes a La Ila iel 18 iscrzions de plu, tl Istitut tecnich Raetia a Urtijëi 13 de plu, tl Lizeum d'Ert Cademia 9 de plu y tla scola prufescionela 12 de plu.
L record de iscrizions tla scoles autes y prufescioneles desmostra aldò dl ntendënt Roland Verra che l mpëni de purté nuviteies te scola à nce purtà fruc. "Tenian cont che te nosta valedes ne pudons sambën nia pité duta la spezialisazions de scoles autes, vëijen che i programs che vën pitei toca l nteres de nosc jëuni" nscì l ntendënt ala scoles ladines.

L aumënt de ndut 52 sculeies ie n bona pert unì a se l dé cun l spusté dla tlasses, ma nce cun 15 iscrizions de plu tla prima tlasses. D'autonn saral de ndut 110 che scumëncia si prim ann te na scola auta o prufesciunela paritetica ladina. Permez al ann passà ie chësc 16% de plu.

La iscrizions tla scoles de ublianza y tla scolines depënd dal svilup demografich dla populazion. La cumpëides per l ann de scola 2013/14 ie feter valives a chëles dal ann passà. Tla scolines iel 687 iscrizions (+0,7%), tla scoles elementeres 1262 (-1,7%) y tla scoles mesanes 795 (-2,8%).

A chësta maniera ie la cumpëida generela de iscrizions ala scoles ladines, dala scolina nchin ala scoles autes, ie drët valiva a chëla dal ann passà. D'autonn saral 3278 sculeies tla scoles ladines, che ie 0,3 percënt de plu permez al ann passà.

as

Galaria dales fotografies

Per l autonn se à scrit ite 11 percënt de plu sculeies tla scoles autes, 21 de plu nen saral me tl Lizeum artistich cun scola prufesciunela (foto USP).