Atualità
Zënter de cumpetënza de prutezion zevila tla Università
La prutezion zevila dëssa deventé materia academica. La Jonta provinziela à (NCUEI) ai 15 de auril dat pro de mëter su n zënter de cumpetënza tl’Università de Bulsan n cont de scunanza dal meldefuech y catastrofes natureles.
L zënter de cumpetënza nuef dëssa unì njenià ite tla facultà de ingenieria y dëssa tò ite segurëza, scunanza dal meldefuech y catastrofes natureles. "Son dla minonga che nosta prutezion zevila ie n model y perchël dëssela nce unì studieda y nsenieda a livel universiter" à dit l presidënt dla Provinzia Durnwalder tla cunferënza stampa do la senteda dla Jonta. L custimënt per mëter su chësc zënter de cumpetënza, de na milion de euro al ann per i prim doi ani, dëssa daldò unì curì cun cuntribuc dala Union Europea. (USP)
as
