Desvalì | 30.05.2013 | 07:57

Cunsëies y sensibilisazion de segurëza ti tuniei (cun audio)

N cajo de desgrazies, mel de fuech o problems al auto te n tunel possa l drë cumpurtamënt salvé truep. Uni un possa judé pea a arjonjer plu segurëza ti tuniei. L Assessorat provinziel ai lëures publics à anjenià n julantin, te trëi rujenedes, cun cunsëies de segurëza ti tuniei.

Regules de streda for plu sciorfes, l mpëni dla forzes dl orden, pruvedimënc a frabiché y dantaprima la nfurmazion, ie aldò dl assessëur Florian Mussner la rejon che à fat calé la cumpëida de desgrazies ti tuniei. Dal 2002 al 2012 iel ti tuniei me plu suzedù mez tan de desgrazies. "Uni un che avisa n mesun possa cun l drë cumpurtamënt judé pea dassënn per plu segurëza per sé nstës y per i autri ti tuniei" mët a cuer l assessëur Florian Mussner.

"L drë cumpurtamënt ie la fundamënta per pudëi mucé segures ora dl tunel n cajo de desgrazia" sorissea Christoph Oberhollenzer diretëur dla scola di destudafuech de Vilpian che à culaburà al proiet de nfurmazion. Tl tunel se tratela n cajo de meldefuech de lascé jì l alarm dl tunel, cherdé su al telefonn ne porta nia.

Deberieda cun la scola de destudafuech y i destudafuech da Maran à l Assessorat ai lëures publics laurà ora na campania de nfurmazion sun la segurëza tl tunel. Te n julantin dal moto "Metëde verda te tunel" vëniel dat inant nfurmazion sun l drë cumpurtamënt. Tl Südtirol iel al mumënt 55 chilometri de streda che passa tres tuniei. "L tunel plu lonch ie chël de Leifers cun 2,6 chilometri, deberieda cun chël a Auer y chël che unirà mo giaurì a Maran" spiega l assessëur. Per la segurëza di 199 tuniei dla Provinzia de Bulsan iel bele unì tenì cont tla proietazion y pona sambën tl mantenimënt che ie de gran valor. "Pra la proietazion, l mantenimënt y tl cajo de desgrazies laurons scialdi deberieda cun i destudafuech y nce chësc ie de gran valor" sorissea Mussner.

L julantin tla rujeneda tudëscia, taliana y ladina ie da giapé tl assessorat ai lëures publics (tel 0471 412337/38) ulache n possa nce se damandé la verscion digitela per publicazions locales. L julantin tl format pdf possen nce se tò ju dala plata web www.provinzia.bz.it/mussner. (USP)

as

Galaria dales fotografies

N cajo de desgrazia te tunel dëssa la cherdeda d’emergënza unì fata pra la stazion d’emergënza, cherdé su al telefonn ne porta nia.

L julantin nuef dà cunsëies de co se astilé te tunel n cajio de desgrazia.

Downloads