Atualità
Livel dl nglëisc tla scoles ladines: prejentazion ai 6 de juni
Tla scoles ladines iel unì fat na nrescida sun la cumpetënzes di sculeies tla rujeneda nglëija. L se trata de n cheder dla situazion te duc trëi livei de scola: tl’elementeres, tla mesanes y tla scoles autes. I resultac laurei ora a livel scientifich unirà prejentei n juebia 6 de juni tl palaz Widmann a Bulsan.
La nrescida y la valutazion di resultac n cont dla cumpetënza tl nglëisc ie unides cumpaniedes a livel scientifich dala prufessëures Rita Franceschini y Martina Irsara. La diretëura dl Zënter Cumpetënza Lingac dl'Università Liedia de Bulsan y la tuadëura tl ciamp dla rujeneda nglëija prejenterà i scric cun si particulariteies y n ressumé di resultac cumplessifs. Sun l valor dla nrescida y senificat per l'aministrazion dla scola rujenerà l assessëur ladin Florian Mussner y l ntendënt Roland Verra.
Culaburadëures di media ie nviei ala cunferënza stampa
n juebia, ai 6 de juni 2013
dala 10 danmesdì
tla sala stampa dl palaz Widmann,
Plaza Silvius Magnago 1 a Bulsan
y de fé al savëi i resultac dla nrescida.
I resultac dla nrescida sun l livel dl nglëisc tla scoles ladines vën nce publichei te n cudejel te cater rujenedes. Cun chësta publicazion, che ie unida a s'l dé tres na bona culaburazion danter la cuordinadëssa dl Servisc per l'evaluazion dla scoles ladines Rosa Maria Mussner, l Zënter Cumpetënza Lingac dl'Università Liedia de Bulsan, l'Università Vita-Salute San Raffaele de Milan, y l Departimënt Educazion y Cultura Ladina, Inovazion y Consulënza, stlujen ju l'analisa dla cumpetënzes linguistiches dl ladin, tudësch, talian y nglëisc.
as
