Desvalì | 21.05.2013 | 09:39

Internet aslöm ćina a Al Plan: i laûrs mët man (cun audio)

Danter Longega y Al Plan vëgnel metü man chisc dis i laûrs por arjigné i rôs dl internet aslöm. Cun chisc laûrs scomëncia na linia de intervënć da pert dla Provinzia de Balsan por portè i coliamënć de fira otica tla Val Badia. L’internet aslöm assigurëia le dagnì economich y sozial ti paîsc da munt, sciöche i nüsc” sotrissëia l’assessur provinzial Florian Mussner.

I rôs por l'internet aslöm é bele arjignà ćina a Longega. Le proscimo laûr é śëgn chël da i mëte jö ćina a Al Plan. Do na gran preparaziun y tratatives éra śëgn tan inant da podëi scomencè cun i laûrs. "I ùn plü iadi porvè da mëte da jì l'internet aslöm por Mareo, mo ara n'é nia jüda. Porchël sunse dër contënć che an po mëte man cun i laûrs por arjunje na soluziun definitiva por chësc raiun" spliga l'assessur Florian Mussner, che se crüzia dla rëi internet tla Provinzia.

I rôs por l'internet aslöm danter Longega y Al Plan vëgn metüs jö sön la linia dla strada. Por chësc intervënt sön na lunghëza de feter cater chilometri fej la Provinzia n'investiziun de 411.500 euro. I laûrs da ćiavè sö y mëte jö i rôs ti é gnüs surandà ala firma Alpenbau da Terenten, che â pité da i fà por 306.364 euro, lascian do le 21 porcënt dla soma proietada. Por ćiavè sö, mëte jö i rôs y curì pro él odü danfora 60 dis de laûr.

I proscimi laûrs por l'internet aslöm tla Val Badia é odüs danfora da Picolin a La Ila y a San Martin. Por tachè adöm le coliamënt da Lungega a Picolin él gnü fat n'acordanza por s'anuzé dla strada dles rodes che vëgn fata chësc ann d'aisciöda-isté. Le program prevëiga inće da arjunje La Val y Rina cun la fira otica. "Sce an ti ćiara al dagnì val debojëgn da avëi l'internet aslöm inće ti pici paîsc da munt, chësc dantadöt por i jogn y les scores, mo inće por l'economia y les istituziuns" sotrissëia l'assessur Mussner.

Da pert dla Provinzia de Balsan él gnü programè da portè i coliamënć de internet aslöm tres fira otica ćina te vigni comun. La spartiziun dl coliamënt dales singoles zentrales ales ćiases é spo tles mans di comuns. (USP)

as