Atualità
Sparani per n cuatier: cuntribuc per cuatieres tl zënter
Do che l vën bele n pez laurà te na pruposta de lege “sparani per n cuatier”, giatela for plu forma. (NCUEI) Ai 21 de mei à la Jonta provinziela tëut na dezijion de mascima per mudé la lege de sustëni a frabiché l cuatier. Te chësta mudazion dëssel unì metù a jì pruvedimënc atratives per ressané vedla cëses ti zëntri di luesc.
"Chiche sparania dëssa unì premià": do chësc prinzip à la Jonta provinziela nvià via n model nuef de sparani per pudëi se fé n cuatier. "Ncuei ons tëut la dezijions de basa che unirà śën ntegredes te na pruposta de lege" à dit l presidënt dla Provinzia Luis Durnwalder do la senteda dla Jonta. N resta pra l model a chël che n ova bele pensà: na cumbinazion de sparani tl fond de pension sëuraprò, cuntribuc y na garanzia dala Provinzia. "Tres chësta cumbinazion giata jëuni la puscibltà de ruvé tosc pra capital assé, per se anjenië nstës n cuatier" à dit Durnwalder.
La mudazion ala lege de sustëni a frabiché l cuatier ne unirà nia me mudeda tla pert che reverda l sparani per n cuatier, ma nce per junté ite na regulamentazion per n majer sustëni a ressané de vedla cëses ti zëntri di luesc. "Cun chësta mudazion nes on tëut dant de plu cosses" à dit l presidënt dla Provinzia: "Na revalutazion di zëntri, la defendura dla cuntreda y n cuntribut a ti dé sgors al'economia".
La pruposta dla Jonta provinziela vëija dant de ti judé ai chemuns o a firmes de costruzion a ressané vedla cëses ti zëntri te chëla che la Provinzia mprësta bele danora tant che puderà unì trat ju dala chëutes stateles. "Mpede tré ju la somes te tëmp de diesc ani dala chëutes, ti les mpreston bele danora al patron dl cuatier che les paia pona de reviers te chël mumënt che l possa les tré ju dala chëutes" à dit Durnwalder. Sce l ne vën nia me fat n ressanamënt, ma nce pruvedimënc per sparanië energia, giaten nce n bonus de cubatura.
La terza atrazion reverda chiche uel cumpré n tel cuatier ressanà: "Ulon ti dé n majer cuntribut a chiche compra n tel cuatier, ajache la Provinzia sparania l custimënt dla roles de ruvé permez y dl grunt da frabiché" à dit l presidënt dla Provinzia. Normalmënter se tratela de feter 30.000 euro che ruva mo leprò ai cuntribuc per se fé l cuatier. (USP)
as
