Atualità
La Rë zivica per ladin cumplësc mez ann: bilanz drët positif
L bilanz do l prim mez ann dla Rë zivica per ladin mostra su n resultat tler: for plu zitadins se nuzea dl portal de nfurmazion, nutizies y servijes dl’aministrazion publica. La plates www.provinzia.bz.it fova jites online ai 5 de dezëmber y cumplësc (NCUEI) sies mënsc.
La gran varietà de nfurmazion, nutizies y servijes da pert dla Provinzia de Bulsan y dl'aministrazion publica locala dassova nce unì piteda tla rujeneda ladina. "Do l prim mez ann udons che l ie for de plu zitadins che se nuzea nce dl portal internet per ladin. Chësc ie drët positif ajache l miurea dassënn l cuntat dl'aministrazion publica cun la populazion ladina" dij l assessëur ladin Florian Mussner.
Te sies mënsc ie la plates web dla Rë zivica unides vijitedes 14.440 iedesc che fej ora na media de 80 vijites al di. L plu iel sambën unì nuzà la plata prinzipela (http://www.provinzia.bz.it/) che pieta la porta de ntreda a na lingia de nfurmazion, nutizies y servijes. Iust pra i servijes iel ultimamënter unì laurà inant y juntà pro na dësseina de servijes nueves per ladin. De ndut pieta la Rë zivica feter 900 servijes y 1000 formuleres. Na mpurtanza particulera per na grupa de rujeneda de mendranza à la sezion dla publicazions. Chësta ie unida anjenieda per l di mundiel dl liber ai 23 da auril y ie danter la sezions plu nuzedes dai zitadins. Davia che for plu jënt se damanda la nfurmazions y la nutizies canche les ie ora de cësa, iel nce unì anjenià na verscion dla Rë zivica per l fonin. Al adres www.provinzia.bz.it/m/la possen udëi l'ultima nutizies dala Provinzia, l reghister dal telefonn, la situazion sun streda, la previjions meteo, la situazion n cont de pericul de levines y l reghister de cuntac di ufizies dl'istituzions publiches.
L servisc meteo ie nce tla verscion ladina dla Rë zivica l servisc plu nuzà. Propi l di dl prim mez ann, iel unì arjont l lim dla 12.000 vijites dl meteo ladin (www.provinzia.bz.it/meteo-ladin). Sëuraprò ala previjions per dut l raion dl Sudtirol y ti singuli raions, iel da permò unì nvià via la verscion ladina nce per l tëmp sa mont. "Iust canche n scumëncia a jì for plu da mont su ons ulù pité la verscion ladina nce per la previjions sa mont" spiega l assessëur Mussner. Che chësta nuvità vën nuzeda dassënn demostra la statistica: tl mëns de mei iel unì arjont l record cun 2612 vijites. Per tenì l var di tëmps vën la previjions meteo plu de atualità nce publichedes sun i social media. Plu avisa sun facebook (Jonta dla Provinzia de Bulsan) y sun twitter (https://twitter.com/ProvinziaBZ).
La Rë zivica per ladin ie unida anjenieda per doi rejons prinzipeles: per pité la nfurmazions per i ladins te si rujeneda dl'oma y dal'autra pert per valorisé la grupa da rujeneda ladina. La realisazion ie unida cureda dal Servisc de comunicazion deberieda cun l Ufize cuestions linguistiches y la sozietà de nfurmatica SIAG. La Rë zivica ie l portal plu nuzà dl Sudtirol y la grupa de mendranza ladina ie reprejenteda al medemo livel sciche la maiuranza tudëscia y taliana. (USP)
L'adresses inernet
www.provinzia.bz.it
www.provinzia.bz.it/m/la (verscion per l telefonn)
www.provinzia.bz.it/meteo-ladin
as
Galaria dales fotografies
