Atualità
Provinzia y chemuns: prugramazion dl’antënes per i fonins
L’antënes per i fonins ne uel deguni avëi daujin a cësa, ma duc les adrova. Tla senteda deberieda dla Jonta provinziela y dl Cunsorz di chemuns iesen ruvei a una che l dëssa unì laurà ora plans che vëij dant ulache l ne possa nia unì metù antënes y ulache l unirà fat su stendri. Nsci vëniel arjont na bona efiziënza stravardan la populazion da radiazions massa stersces.
La lege naziunela ti lascia me puecia lerch de muvimënt al'aministrazion locala per abiné na soluzion al problem dl'antënes per fonins massa daujin ala cëses. Se nuzan de chësta pitla lerch de muvimënt uel la Jonta provinziela y l Cunsorz di chemuns mëter a jì n plann che vëija dant te ciun raions che l ne possa nia unì metù su n'antëna per fonins.
Per smëndrì na destribuzion de de plu antënes ie i assessëures provinziei y i ambolc stai a una de udëi dant lueges per mëter su stendri. Chisc dëssa unì fai dal'aministrazion publica y pona fitei ala sozieteies dal telefonn. "Sambën che i stendri da plu tl uedl, ma n cont dla radiazions iesi dessegur miec che l'antënes sun i tëc dla cëses, sciche l ie bele te plu luesc" à dit l presidënt dl cunsorz di chemuns Kompatscher tla cunferënza stampa deberieda cun l presidënt dla Provinzia. Provinzia y chemuns à udù dant se mëter a una cun la sozieteies dal telefonn tres n protocol de acurdanza. L plann di stendri dal'antënes dëssa mo unì fat ntan chësc ann. (USP)
as
