Atualità
Mplant dal refudam scumëncia la proves ala fin de juni
Ala fin de juni scumëncia l mplant dal refudam a Bulsan Sud si atività. Ntan i prim sies mënsc uniral tenì na fasa de prova, per chëla che la cumuniteies de raion menerà adalerch si refudam. L’acurdanza aldò - danter la Provinzia, la cumuniteies de raion y l gestëur ECO Center AG - ie (INIER) ai 10 juni unì azeteda dala Jonta provinziela.
Sun pruposta dl assessëur Florian Mussner à la Jonta provinziela tëut de plu dezijions che reverda l furnel dal refudam a Bulsan Sud. La sozietà ECO Center unirà bele ntan i mënsc de prova nciarieda cun la gestion tl mplant, scebën che n ova pensà de lascé fé la proves dala firma che à frabicà l mplant. "A chësta maniera possa la ECO Center fé sperienza dal scumenciamënt y pona cun l ann nuef lauré de plën" à dit l presidënt dla Provinzia Luis Durnwalder.
La segonda dezijion reverda i sies mënsc de prova, che se lascia me fé sce l vën menà adalerch refudam. Te n'acurdanza se à la cumuniteies de raion tëut l mpëni de mené adalerch l refudam che va de bujën, scumencian dai 30 de juni.
La Jonta provinziela à mo n iede dat pëis che l mplant dal refudam vede ai chemuns. L custimënt de fé l mplant y dl ressanamënt dl grunt, l mplant de sciaudamënt a destanza cun i culegamënc dala lectrisc vën a custé ntëur 140 milion de euro. (USP)
as
