Atualità
Jonta provinziela à metù su l servisc per tò ite chëutes
La Provinzia y i chemuns arà nstes n’agenzia che se cruzia de tò ite chëutes y straufonghes. L at de fundazion cun statut ie (INIER) ai 10 de juni unì azetà dala Jonta provinziela metan su n pot de referimënt per i zitadins canche la se trata de chëutes y tarifes.
Cie che nchinamò pudova me fé l Stat, possa l'aministrazions locales cun l prim de lugio 2013 fé nstës n cont de chëutes, tarifes o straufonghes cun cie che toca leprò. "Deberieda cun i chemuns ons tëut la dezijion de nia sëurandé chësc servisc a d'autri, ma de l curì nstës cun n'agenzia" dij l presidënt dla Provinzia Luis Durnwalder. La sozietà "Südtiroler Einzugsdienste AG/Alto Adige Riscossioni SpA" ie unida metuda su dala Jonta provinziela cun l duvier de fé ora i conc dla chëutes y de les tò ite per cont dl'aministrazions publiches che uel zapé ite tl'agenzia.
Avëi nstës na tel agenzia porta vantajes per la Provinzia, i chemuns, l aministrazion y nce per i zitadins. "Ala istituzions portela na revalutazion dl'autonomia finanziera ajache les possa cialé do i muvimënc finanzieres" dij Durnwalder. Sëuraprò possa la ntredes unì tëutes ite a na maniera plu efiziënza y cun manco burocrazia, chësc ti va nce a bën dl zitadin. L vën tlo pensà a mesuns de paiamënt inuvatives y a pité tres internet nfurmazion che va de bujën. N auter vantaje per i zitadins ie aldò dl presidënt dla Provinzia chël de avëi na zentrela unica canche la se trata de paiamënc ai ënc publics.
Per scemplifiché la pruzedures ons metù su l'agenzia nueva cun mesuns dla Provinzia, i autri ënc possa pona te n segondo mumënt zape ite. La cuinta pert dl'agenzia ie resserveda ai chemuns. L gremium plu aut dla sozietà ie la reunion de coordinazion, de chëla che fej pert i reprejentanc de duc i ënc cumëmbri. L unirà nciarià n cumité de gestion cun trëi reprejentanc dla Provinzia, l presidënt dl Cunsorz di chemuns y doi reprejentanc di autri ënc cumëmbri.
La Jonta provinziela à bele numinà i cumëmbri dl cumité de gestion cun Andrea Gröbner, Sonja Pichler y Domenico Laratta. Per l dl cumité de cuntrol iel unì numinà Arthur Scheidle, Roberto Ninni y Florian Martha. (USP)
as
