Atualità
15 de juni prim di d’ejams dla mesana, ai 19 de matura
Tla scoles ladines iel chëst ann 290 candidac per l ejam de scola mesana y 63 per la matura (ejam de stat). N sada ai 15 de juni uniral tla cin scoles mesanes dla valedes ladines tenì l prim di de ejam, tla trëi scoles autes ladines scumëncia i ejams de matura ai 19 de juni.
L'ejam dla scoles mesanes vëniel damandà cin proves scrites. Ti luesc ladins ie una de chësta proves tla rujeneda ladina mpede per nglëisc sciche tl'autra scoles dla provinzia de Bulsan. "N autra particularità dla scoles paritetiches ladines ie che la rujenedes tudësch, talian y ladin vën damandedes al medemo livel de dificultà" spiega l'ispetëura Romi Crazzolara. La proves scrites nia de rujeneda reveda conc y la prova naziunela ulache la se trata de na cumbinazion de conc y cumprenscion de leteratura. Tla proves a usc vëniel damandà duta la materies dla terza mesana.
La scola mesana cun la majera cumpëida de candidac de ejam ie chëst ann inò Urtijëi cun 98 sculeies, dan chëla de Sëlva (66 sculeies), La Ila (64 sculeies), Al Plan (32 sculeies) y San Martin (30 sculeies).
I ejams de matura scumëncia ai 19 de juni y nsci cater dis plu tert permez ala mesanes. Autramënter che tla scoles tudësces o talianes, possa i candidac dla scoles ladines crì ora danter l tudësch y talian per la prima prova scrita. La segonda prova scrita reveda na materia spezifica dla scola n cuestion, crissa ora dal Ministero a Roma. Tla terza prova ie metuda adum dala cumiscion de ejam y reverda chëla rujeneda che l candidat ne à nia cris ora l prim di, cun leprò dumandes de materies defrëntes. "Tlo possel te nosc cajo nce unì damandà velch de ladin, nsci sciche la sarà pona tl ejam a usc" spiega l'ispetëura. Tla pert a usc se tratela danterauter nce che l candidat mostre si cumpetënza tla cater o cin rujenedes, l prejenté n argumënt y de fé culegamënc danter la materies.
Tla scoles autes da La Ila iel chëst ann 14 candidac. A Urtijëi nen iel 30 tl Istitut Raetia y 19 tl Lizeum d'ert.
as
