Atualità
L’assessur provinzial Mussner sön la banda leria: i mesi é dan man, coliamënt ćina la fin dl 2013
L’assessur provinzial Florian Mussner ti respogn ales ćiacoles che la Provinzia n’ess nia assà mesi por colié düć i comuns ala rëi de fires otiches ćina la fin dl 2013. "Le plan vel inant, i mesi che va debojëgn é bele dan man", spliga Mussner.
Bele dan da de plü agn s’à la junta provinziala tut dant da colié düć i comuns por la fin de chësc ann ala rëi de fires otiches. "Nos se cruziun dl coliamënt di punć zentrai ala rëi sura döta la provinzia, i comuns deperpo se crüzia dl coliamënt dl’ultima milia", insciö l’assessur Mussner. Al desmentësc les ćiacoles che al ne foss nia assà mesi por tignì ite le plan de coliamënt. "I ne sa nia da olache chëstes ćiacoles vëgn y i po ma dì che al n’é nia vëi", insciö l’assessur provinzial. I mesi che al va debojëgn por rové la rëi de fires otiches dla provinzia é bele dan man, i laûrs é preodüs, le plan vëgn tignì ite.
"Y inće por ći che reverda l’ultima milia fajunse döt ći che ara va por daidé i comuns", insciö Mussner, che fej l’ejëmpl dl fonds de rotaziun amplié de 50 miliuns de euro por chësta rajun. "Chisc scioldi é a desposiziun di comuns che à laurè fora so masterplan y adora mesi por realisé les mosöres preodüdes dailò", insciö l’assessur provinzial.
usp
