Atualità
Jonta provinziela dà pro l plann per la stieres
L plann provinziel per de plu stieres ti ani 2014 nchin 2021 ie l strumënt dla Jonta provinziela per rafurzé l marcià dla stieres tl Sudtirol y per auzé nchin al 2020, la cumpëida dla jënt che à da lëur al 80 percënt. (NCUEI) Ai 24 de juni à la Jonta provinziela dat pro l documënt de mascima che vëija danterauter dant n cuntrat dla generazions tl’servisc publich, manco chëutes per i patrons de lëur y na sburdla al’economia dl frabiché.
Dan mez ann ova la Jonta provinziela fat ora de anjenië l plann dl’ocupazion per i ani 2014-2020 bele n ann plu abenëura. La rejon fova la crisa che se lascia sentì nce sun l marcià dla stieres tl Sudtirol. Dan doi enes ova la cumiscion provinziela per l lëur azetà l plann per la stieres, śën l à l assessëur Roberto Bizzo prejentà tla Jonta provinziela. L Presidënt dla Provinzia à cunedì che la Jonta à azetà l documënt de mascima y che tla proscima sentedes uniral tratà i 44 pruvedimënc udui danora.
L presidënt Durnwalder à dit che la cuota dla jënt zënza lëur à arjont la sëida di cater percënt y che l ie dantaldut i jëuni che à dificulteies a zapé ite tl marcià dl lëur. “Te chësc ciamp, dantaldut canche la se trata di jëuni, vala de se muever per tëmp. Nce sce, per ejëmpl, la cuota di jëuni zënza lëur ne ie nia tan auta sciche te d’autri raions, ulons ti jì permez cun pruvedimënc cuncrec”.
L travert prinzipel dl plann nuef per la stieres ie de auzé la cuota dla jënt che à da lëur da 76,9 a 80 percënt tl ann 2020. L Sudtirol ie bele sëura l travert europeich de 75 percënt y sëura la cuota taliana che ie te chësc mumënt al 61 percënt. Ma chësc ne ti basta nia ala Jonta provinziela.
“Nce sce on de bona zifres, ne se cuntentea chiche ie zënza lëur y che uel nce lauré, dessegur nia dla statistiches” à dit Durnwalder.
L plann dla stieres vëija dant 44 pruvedimënc che va da n cuntrat dla generazion tla stieres publiches, manco chëutes per mprenditëures che tol su culaburadëures nueves, sustëni per patrons de lëur, abiné velch da fé per chëi che ie bele plu giut zënza lëur nchin a pruvedimënc per l ciamp dl frabiché.
Un di pruvedimënc plu inuvatives ie l cuntrat dla generazions che dëssa n iede unì metù n droa tl’aministrazions publiches. Aldò dl presidënt iel tlo udù dant che culaburadëures che ie a trëi nchin cin’ ani dan la pension, pudëssa judé pro al barat de generazion te chëla che i lëura manco ëures ti lascian lerch a de jëuni. “Chisc culaburadëures davaniessa nsci sambën de manco, ma perchël ti paiessa la Provinzia la defrënza n cont de cuntribuc per la pension, a na maniera che i giapa mpomo la pension plëina canche la sarà tan inant” à dit Durnwalder.
I pruvedimënc per rafurzé l marcià dl lëur dëssa nia me tuché i lauranc, ma nce i patrons de lëur. Y chësc cun manco chëutes: “Unlon sustenì chëi mprenditëures che pieta stieres zënza limitazion de tëmp. Ëi dëssa pudëi tré ju trëi ani la chëuta IRAP per culaburadëures nueves zënza limitazion de tëmp” à dit l presidënt.
L ciamp dl frabiché, te chël che la crisa se lascia sentì dassënn, dëssa unì sustenì cun pruvedimënc speziei. L presidënt Durnwalder à rujenà de sustëni per l ressanamënt de vedla cëses, sustëni per cumpré de vedla cëses y che la Provinzia mpresté danora tant che i zitadins puderà tl tëmp tré ju dala chëutes. (USP)
as
