Atualità
Cuncors de fotografies tl Parch Puez-Odles: dajëde śën ite la fotografies sun la tematica dl’ega
Per l ann internaziunel dla cooperazion per l’ega 2013 urganisea la Cësa dl Parch naturel Puez-Odles deberieda cun la Bibliotech de Funes n cuncors de fotografies sun la tematica dl’ega. Granc y pitli possa dé ite si fotografies nchin ai 31 d’agost 2013.
Vedli y jëuni, fotografs per pascion y de prufescion – duc ie cherdei a fé pea pra l cuncors de fotografia. L ne ti vën metù dant degun rëm ala criatività: De mpurtanza iel mé che l se trate de fotografies sun la tematica dl’ega tl raion dl Parch naturel Puez-Odles: la fotografies dla cuntredes à da vester tëutes su tl Parch Naturel y tieres y plantes muessa unì dant te chësc parch.
A chësta moda à la partezipantes y i partezipanc truepa pusciblteies de traté cun si aparat da fotografé la tematica dl’ega tl Parch naturel Puez-Odles: L’ega possa unì reprejenteda te si culëures y formes defrëntes tres la sajons. La fotografies muessa unì mandedes ite nchin ai 31 d’agost 2013 ala Cësa dl Parch naturel Puez-Odles. Iló uniral ai 20 de setëmber nce tenì la premiazion. La fotografies plu beles unirà metudes n mostra tla Cësa dl Parch naturel Puez-Odles y tla Bibliotech de Funes.
Ntant ie tla Cësa dl Parch naturel Puez-Odles bele unit ite la prima fotografies per l cuncors. Mutons/mutans ne à nchin śën mo mandà ite deguna fotografies – chël ie da muië, ajache lmut/la muta tla categuria mutons/mutans nchin a 14 ani (nasciui dal 1999 inant) che vënc, giapa n aparat da fotografé Canon Powershot SX260 dl valor de 255 euro. L pest prinzipiel dl cuncors tla categuria adulc/adultes ie na aparat da fotografé Canon Powershot G1X dl valor de belau 600 euro.
Cun l cuncors de fotografies ulëssa la Cësa dl Parch naturel Puez-Odles y la Bibliotech de Funes dé n mpuls a duta la persones nteressedes a se dé ju, te chësc ann internaziunel dla cooperazion per l’ega, cun la tematica dl’ega tl Parch naturel Puez-Odles.
L ann internaziunel dla cooperazion per l’ega ie unit cherdà ora dala Nazions Unifiedes (ONU) cun l obietif de sensibilisé la jënt sun la problematiches for plu grieves n cont dl’ega, de ncurajé a crì soluzions per i bujëns y sustenì la persones a sparanië l’ega y la traté cun plu respet.
I Parcs naturei dl Südtirol à perchël detlarà l argumënt di raions de vita tl’ega cun si flora y fauna rica coche la tematica zentrela dl ann. Te uni Parch naturel vëniel metù a jì escurscions te raions d’ega y da paluch. Per la scoles elementeres y mesanes iel unit metù a despusizion la ufierta didatica “WasserLebensRäume” (RaionsdeVitadaEga) y duc i vijitadëures possa unì a ti cialé ala mostra “WasserLebensRäume-Naturparks Südtirol”.
Dates y lueges dla mostra fotografica itineranta, duc i proiec che vën metui a jì y l formuler de partizipazion ie da ciarië ju dalla plata web dla Repartizion provinziela Natura, cuntreda y svilup dl teritore sota
www.provinz.bz.it/natur-raum. Nfurmazions sun l cuncors de fotografies y l formuler de partezipazion giapëis tla Cësa dl Parch naturel Puez-Odles (tel: 0472 842523) o tla Bibliotech de Funes (tel. 0472 840410).
usp
