Atualità
Cunzet de mubilità per l’arpejon mundiela Dolomites
N cunzet de mubilità per dut l raion dla Dolomites ie l ubietif dl assessëur ala cuntreda y presidënt dla fundazion Dolomites-Unesco Elmar Pichler Rolle. Si vijion ie chëla de n raion cun puech trafich, ma zënza destò l mesun de ruvé permez ai luesc. La prupostes de mubilità ie states argumënt de n’ancunteda cun l deputat Daniel Alfreider.
L cunzet de mubilità per l raion detlarà arpejon munidiela ie per tramedoi atëures n argumënt ciaut: aldò de Alfreider se tratela per l’economia de mantenì la vies per ruvé permez, scebën che l trafich ndividuel crësc for de plu y chësc ne ie nia bon per l image dl’arpejon mundiela. Purempò uel l assessëur Pichler Rolle purté inant l cunzet, magari nce me n var al iede, ma cun na mira tlera: “Sun n tëmp plu lonch muessa l cunzet purté n saut de cualità”.
L assessëur uel abiné adum duta la nfurmazions sun la situazion dl muvimënt de streda, tulan nce ite chëles che Alfreider à de si ncësa Corvara. Duc i dac dëssa pité na basa de nfurmazion per cherdé ite la prima ancuntedes de lëur.
Alfreider ti à metù a cuer a Pichler Rolle de tré ite i mplanc portamont ntan l instà, pensan tl medemo tëmp a limitazions sun streda. Sibe l assessëur che l deputat ie a una sun la mpurtanza de scuté su duta la pertes nteressedes.
Sëuraprò a rujené dl cunzet de mubilità, à i doi nce tratà la puscibltà de prejenté l’arpejon mundiela Unesco tl parlamënt a Roma.
as
Galaria dales fotografies
L assessëur Pichler Rolle y l deputat Alfreider uel purté inant l cunzet de mubilità per la Dolomites-Unesco.
