Atualità
Jonta provinziela: genitores muessa curì tant che la Provinzia à paià danora per si familia
La Provinzia de Bulsan à ntan l ultimo ann paià ora 514 families cun 814 mutons cun genitores spartì, ulache una pert di genitores ne tën nia ite l duvier de paië l mantenimënt. La Jonta provinziela à (NCUEI) ai 08 de lugio nciarià l Aucatura dla Provinzia de crì manieres per fé paië i peresc si pert metuda dant dala suneria.
Aldò dl urdenamënt giuridich talian à tramedoi genitores l duvier de mantenì si mutons aldò de si davani y avëi, unfat sce i vif deberieda o spartì. Davia che l ie de plu caji ulache i peresc spartì ne paia nia l mantenimënt de si families, juda la Provinzia tres n ufize aposta. La Provinzia paia danora la families cun mutons y se fej pona dé i scioldi dal genitore (majera pert pere) che à l duvier de paië. La Provinzia de Bulsan ie dl 2003 stata la prima a livel talian a mëter a jì chësc aiut. "Tl 2012 iel unì paià ora 514 families cun de ndut 814 mutons. Chësc à fat ora na soma de 1.922780 euro" à dit l presidënt dla Provinzia Durnwalder do la senteda dla Jonta.
L problem ie te chisc caji dantaprima pra i peresc che ne paia nianca tant che la Provinzia à bele dat danora. Aldò dl presidënt dla Provinzia ne iel nia cis 10 percënt de chisc peresc che paia al Aministrazion publica, tant che chësta à bele paià danora a per si familia. Tl Deutschland iel ënghe de tel situazions, ma iló iel 19 percënt di peresc che ti vën, te n segondo mumënt, do ai si duvier.
Per ti jì permez a chësc problem ie i assessëures provinziei stai a una de nciarië l ufize de Aucatura de crì manieres per fé paië i peresc l mantenimënt a si families, che la Provinzia à bele paià danora. (USP)
as
