Atualità
Lëures de prëscia sun la streda de Plan de Gralba
L semafer danter Plan y Plan de Gralba, ulache la streda fova zeduda, ëssa dantaprima tla sajon auta purtà de majera dificulteies a furné sun i jëufs. Sun ntervënt dl assessëur Florian Mussner iel unì nvià via na pruzedura de prëscia per pudëi scumencé i lëures mo dan la sajon: tl segondo mez lugio iel prugramà de pudëi tò demez l semafer.
L toch de streda sëura la Raida da Merch, tl chemun de Sëlva, à ti ultimi ani for inò zedù n puech al iede. Chëst ann d'ansciuda iela ruveda tan inant da mussei, sun un n toch, śaré mesa larghëza de streda. La soluzion ne fova nia scëmpla: "Te chësc cajo iel de bujën ne n majer ntervënt per n custimënt de feter cater milion de euro" spiega l assessëur Florian Mussner. Śën se tratovela de seguré l muvimënt ntan la sajon da instà y perchël iel deberieda cun i tecnics dla Provinzia unì cris do na soluzion che se damanda puech tëmp. "Dala proietazion de mascima per dut l raion ons tlupà ora la pert plu critica y on cun na pruzedura de prëscia finà n iede chëla. Ntant à bele scumencià i lëures y per mez lugio fajons cont de pudëi tò demez l semafer. A chësta maniera iel mesun salvé la situazion dan che ruva l majer muvimënt da instà" sorissea Mussner.
I lëures sun la streda de Plan de Gralba reverda na lunghëza de 65 metri. Aldò dl proietant Hansjörg Jocher vëniel metù micropei uni carata zentrimetri a na maniera che la streda ne possa nia sbriscé mo plu injù. Sëuraprò ti vëniel metù ancores a trazion. Per cumedé chësc toch de streda (al km 23) fej la Provinzia na nvestizion de 139.000 euro.
Pernan che la streda sarà segureda, puderan inò passé provisoriamënter sun duta la larghëza. I lëures dla firma Heinrich Ausserer de St.Felix, jirà pona mo inant nchin ala fin dl mëns per mëter l'ancores a trazion. (USP)
as
