Atualità
Internet aslune da Ciastel nchin te Gherdëina (cun AUDIO)
Chisc dis scumëncia i lëures per purté i culegamënc internet aslune da Ciastel nchin te Gherdëina. La ncëria al firma vel cun data (DA NCUEI) dl 9 de setëmber. I culegamënc internet che ie bele tla valeda ie de avëi dla sozietà dal telefonn, la Provinzia tol ite nce Gherdëina tla rë de fibra otica per garantì culegamënc de cualità per l daunì.
Danter Ciastel y Runcadic uniral te na prima fasa de lëures metù ju la roles per pudëi pona te n segondo mumënt tré tres i cabli de fibra otica. "Da pert dla Jonta provinziela nes on tëut dant de seguré de bon culegamënc internet per duc i chemuns acioche scola, economia y cumenanza posse se nuzé mo miec di mesuns modernes de comunicazion digitela" spiega l assessëur Mussner, che porta inant la rë de internet aslune. I culegamënc che ie bele te Gherdëina ie plutosc vedli: "Cialan al daunì iel nce tlo de bujën de fibra otica a na maniera che la istituzions y pona nce i privac ebe la garanzia de culegamënc che va debota" spiega l ing. Marco Springhetti, cuordinadëur di lëures.
I lëures che scumëncia chisc dis reverda n toch de passa 10 chilometri che scumëncia a Ciastel pra la scola y ruva nchin a Runcadic. Da tlo inant à la Comunità raionela y l Chemun bele metù ju n toch de roles canche l ie unì fat la streda dala rodes. Per mëter ju la roles da Ciastel ite uniral giavà sun na pitla losa te streda de me 12 zentimetri lergia y 40 zentimetri sota. Chësta maniera de lëur tlameda trancing, che ie bele unida sperimenteda te de plu luesc, lascia pro de mëter ju da 200 y 300 metri de roles al di. De ndut iel udù danora feter doi mënsc de lëur per fé l toch da Ciastel a Runcadic.
La Provinzia à per chësc culegamënt udù dant na nvestizion de passa na milion de euro. Do che la firma Alpenbau de Terenen à lascià do l priesc de 16 percënt, vën me i lëures dassëui a custé 614.200 euro.
"Pernan che la roles ie a post, jirons riesc inant cun la segonda y ultima fasa: iló uniral pona trat tres i cabli de fibra otica" spiega l assessëur Florian Mussner. (USP)
---
De plu nfurmazion sun la rë de internet aslune tl Sudtirol ie da abiné a www.provinzia.bz.it/breitband
as
Galaria dales fotografies
Florian Mussner n cont di lëures per l internet aslune te Gherdëina
- Scarica il file audio 571 kb
