Atualità
Prejentazion dla Trienala Ladina y dl pest Argreiter ai 17 de lugio
N mierculdi che vën, 17 de lugio uniral tl palaz Widmann a Bulsan prejentà la mostra "Trienala Ladina" y l pest de scultura Argreiter. Tramedoi scumenciadives ti ciamp dl'ert vën metudes a jì dal Museum Ladin Ćiastel de Tor.
La mostra coletiva, che vën fata uni trëi ani, se à metù l fin de valorisé la produzion artistica ladina. Per l cuarto iede pieta la Trienala n palch, ma nce n pont de referimënt per i artisć de Gherdëina, dla Val Badia, ma nce de Fascia y de Sëuramont cun Ampëz y Fedom. Sëuraprò vëniel nce tenì la porta davierta a artisć di Grijons y dl Friul. La Trienala Ladina sarà chëst ann da udëi dai 19 de lugio nchin ala fin de utober tl Museum Ladin a San Martin de Tor. L lëur de sies artisć vën chëst ann coordinà dal curadëur Alfredo Cramerotti, che à bele laurà per la 55esima Biennale de Unieja.
Sun scumenciadiva dl artist Richard Agreiter, de descendënza ladina, vëniel nce chëst ann dat ora l pest de scultura Agreiter. Chësc cuncors ie daviert a artisć de dut l Tirol storich. L lëur che vencerà l pest sarà nce da udëi tl Museum Ladin deberieda cun la Trienala Ladina.
I doi cuncorsc artistics unirà prejentei
n mierculdi 17 de lugio 2013 dala 10.00
tla sala stampa dl Palaz Widmann, plaza Silvius Magnago 1 a Bulsan.
La prejentazion unirà tenida dal assessëur ladin Florian Mussner, dala diretëur dla repartizion di museums Karin Dalla Torre, dal diretëur dl Museum Ladin Stefan Planker, dal artist Richard Agreiter y dal curadëur Alfredo Cramerotti.
La Trienala Ladina unirà pona giaurida n vënderdi 19 de lugio dala 18.00 tl Museum Ladin a San Martin de Tor.
I culaburadëures di media ie nviei a tò pert y a fé al savëi i cuntenuc.
as
