Atualità
Ai 26 de messè deura “Nubi” tl Istitut Ladin
En vëndres, ai 26 de messè jaràl inant la linia de mostres artistiches da d’isté tl Istitut Ladin Micurà de Rü cun la daurida dla mostra “Nubi”. Te chësta secunda esposizion a San Martin de Tor saràl da odëi espresciuns artistiches de Giancarlo Lamonaca.
Giancarlo Lamonaca (1973) à studié pitöra al’Academia d’ert de Bologna. Te chësc momënt vìrel a Vahrn. Cun sües operes - fotografies te n gran format y istalaziuns söl post - provochëiel la manira de ponsè y de odëi la realté tradizionala. Al ti dà ai posć n significat nü, portan le spetadù te ambiënć a lüsc enigmatics, spo indô linears y definis, o inće ascognüs cun aziuns de camouflage fotografica. Dl 2009 â Giancarlo Lamonaca deboriada cun Philipp Messner davagné le concurs artistich metü a jì dala Repartizion provinziala Cultura ladina.
Pro la daurida, en vëndres ai 26 de messè dales 18.00, podaràn aldì na introduziun dl curadù Luigi Meneghelli y parores de salüt dl presidënt y dl diretur dl Istitut Ladin Albert Videsott y Leander Moroder. L’ambiënt artistich dla daurida gnarà acompagné da na performance musicala de Emanuel Valentin.
L’Istitut Ladin Micurà de Rü, l’EPL (Ert por i Ladins) y la Lia Mostra d’ert, organisadus dla linia de mostres da d’isté, à odü danfora cater mostres a San Martin y por le pröm iade inće öna na mostra a Urtijëi. A chësta manira vëgnel portè pro a miorè le contat danter les döes valades tl ćiamp artistich.
Do la mostra “Nubi“ jarà la seria de mostres inant ai 9 d’agost cun la daurida dla mostra „Por le momënt nia da abiné“ de Fabian Feichter. Les mostres tl Istitut gnarà stlütes jö cun l’esposiziun “Na vita por l’ert” de Lois Irsara che gnarà daurida ai 23 d’agost. La mostra tla Lia Mostra d’ert de Barbara Tavella”Uncutted” sarà da odëi dai 13 de setëmber inant.
An podarà jì a ti ćiarè ales mostres dal lönesc ala sabeda dales 10.00 ales 12.00 y dales 16.00 ales 19.00 y la domënia dales 10.00 ales 12.00. La mostra “Nubi” sarà da odëi ćina ai 5 d’agost. (USP)
usp
