Atualità

Politica | 05.08.2013 | 12:18

Florian Mussner (1/3): RAI, jëuni y rujenedes (CUN AUDIO)

La RAI ladina, stieres per i jëuni de nosta valedes y la posizion dla scola y cultura ladina ie stai i argumënc prinzipei, de nteres ladin, che l assessëur Florian Mussner à tratà te si ancunteda cun i jurnalisć (NCUEI) ai 05 de agost a Urtijëi.

Sciche arjonta storica per la mendranza ladina à l assessëur Mussner cunscidrà l’acurdanza per l finanziamënt dla RAI de Bulsan. Sëuraprò al aumënt de ëures de televijion ladina da 39 a 100 al ann, à Mussner sorissà l gran valor che i jurnalisć posse lauré cun autonomia. “La RAI ladina ne giaterà nia me n’autonomia n cont de strutura, ma dantaprima n cont de aministrazion cun n diretëur de redazion y n respunsabl per dut la pert ladina. N cont dl cuncors per tò su culaburadëures nueves à l assessëur metù a cuer la mpurtanza che la jënt posse audì la nutizies ti si idiom, chël che uni un sënte sciche si rujeneda dl’oma. Perchël à la RAI ulù valivé la cumpëida di culaburadëures ladins aldò dla cunescënza dl idiom de valeda. Te chësc cuntest à Mussner nce damandà n majer barat danter la valedes, ajache l ie de bujën che i jurnalisć se debe nce ju cun la realtà tla valeda ujina. I programs dla RAI Ladina dëssa aldò de Mussner vester da udëi sun dut l raion ladin, nce ti luesc ladins tla provinzia de Belun.

Cialan al daunì à Florian Mussner fat n apel ai jëuni: tl ciamp dla Santità iel aldò dl pruporz 160 stieres mo liedies per ladins. “Ulon sensibilisé i jëuni di luesc ladins acioche i vede la streda de n mestier tla Sanità, ajache te chësc ciamp garantësc l pruporz stieres che ie mo liedies”. Bele dan diesc ani se ova Mussner dat da fé acioche i ladins posse giapé stieres stateles, chësc ne ie pona nia unì a se l dé ajache i ladins ova te chëi ani de bona alternatives de lëur daujin a cësa. Ma per l daunì iel mpurtant che i jëuni ladins feje la furmazion te chëi ciamps che pieta nce puscibltà de lëur ora dla valedes, ajache nce ti luesc ladins saral for manco puscibltà de lëur.

“La scola ladina cun l nseniamënt de plu rujenedes ne ie nia n model che possa unì sëurantëut tl’autra pert dla provinzia, ma l ie dessegur n ejëmpl europeich” à detlarà Mussner. La rujenedes ie na chance per daunì, tl Sudtirol, muessel, aldò dl assessëur ladin, unì svilupà plu respet per l’autra rujenedes. L model scolastich ladin dà cun l mparé de rujenedes la puscibltà de puenc culturei acioche la grupes de rujeneda se sëntes plu liedes danter ëiles. “La cultura ladina ie de chësc viers n ejëmpl europeich, la cultura ladina muessa jì inant sun la streda che la ie jita ultimamënter” à dit l assessëur. (USP)