Atualità

Frabiché | 19.08.2013 | 16:00

Vijità i lëures dla streda de Rina: vijion devënta realtà (cun audio y video)

La Provinzia fej nvestizions acioche uni un posse viver te si luech: che chësta vijion devënta for plu realtà per Rina, à l assessëur Florian Mussner metù a cuer (NCUEI) ai 19 de agost pra la vijita ai lëures dl’ultima pert dla streda nueva.

Uni un che ie cresciù su nce te n pitl luech, dëssa avëi la puscibltà de viver te si luech. Per arjonjer chësta vijion fej l Assessorat ai lëures publics la terza y ultima pert dla streda de Rina per arjonjer plu saurì l pitl luech. „Da pert dla Provinzia fajons nce stredes y culegamënc internet aslune per i luesc plu pitli, ajache ulon che la jënt de chisc luesc ebe la puscibltà de viver te si luech“ à dit Florian Mussner pra la vijita di lëures a Rina, sorissan che chësc ie drët nscila.

A Rina iel unì scumencià a realisé l terzo lot dla streda nueva. Cun chësta ultima y majera pert di lëures, sun na lunghëza de 2.050 metri, vëniel stlut ju n majer lëur per ti garantì n miëur culegamënt al luech de Rina. Tl toch suinsom dla streda de Rina ne iel tecnicamënter nia ta saurì da lauré: “la streda passa n pert te lueges dassënn ërtes cun sotite n material che ne tën nia, perchël messons nce lauré cun micropei” à spiegà l ing. Gustav Mischi, diretëur di lëures. Per ressolver l problem che n auto ne à nia lerch de despassé via n camion vën la streda slargëda a na larghëza de sies metri. Acioche nce na curiera posse ruvé a Rina muessel nchinamei unì slargià la raides: “Te cin' de majera raides vëniel fat na costruzion ulache doi metri de streda passerà sëura l mur ora” à spiegà Mischi.
N’autra dificultà tecnica ie la gran pendënzes. La streda vën splaneda ulache la va, ma te vel lueges ulache la ne va nia, resteral na pendënza nchin a 15 percënt. Per la terza y ultima pert dla streda de Rina fej la Provinzia na nvestizion de 5,5 milion de euro. Ntan i lëures cëlen de lauré a na maniera che l ne ie nia de bujën de semafri y – coche à metù a cuer Mussner – che chëi de Rina ebe nce ntan i lëures la puscibltà de ruvé a cësa zënza majera dificulteies. La realisazion dl terzo lot ie unida prugrameda sun 650 dis de lëur.

La terza pert di lëures stluj ju n proiet che n ova bele scumencià a realisé dan diesc ani cun l puent nuef sëura la Gran Ega. Ti ani 2007-08 ova la Provinzia fat l prim lot sun na lunghëza de 540 metri y l ann passà fovel unì finà l segondo lot sun passa 1000 metri de lunghëza. “Per la trëi pertes dla streda y l puent vëniel spendù de ndut 10,75 milion de euro y a chësta maniera pudons ti pité de miëura pruspetives ala jënt de Rina” nsci Florian Mussner. Nce sce tla prima pert di lëures ne ovela nia butà cun la firma de costruzion che fova jita n malora, ie i aministradëures drët cuntënc che n ie śën ruvei nchin al’ultima pert. Sibe l ambolt Albert Palfrader che l assessëur Florian Mussner à sorissà la mpurtanza che n ie prësc ruvei a una cun i patrons di grunc per pudëi ngrandì y miuré la streda de Rina. (USP)

---
Fotos dla vijita ai lëures per la streda de Rina

Galaria dales fotografies

Prejentà i lëures dla streda de Rina: Florian Mussner cun Albert Palfrader (ambolt), Josef March (dir. Departimënt), Valentino Pagani (dir. Repartizion), Gustav Mischi (dir. lëures); (foto USP/Stuffer).