Atualità
Cursc per ruvé pra na stiera da nseniant
Aldò de na norma nueva possa nsenianc dla scoles elementeres, mesanes y autes che à bele nsenià trëi ani fé pea n curs speziel a na maniera da giapé l’abilitazion a nsenië. La dumandes per i cursc che reverda la scoles ladines muessa unì dates ju nchin ai 25 de setëmber.
Nce tla scoles ladines iel de plu nsenianc che à bele ani de esperienza, ma che ne à nia pudù fé i cuncorsc per giapé na stiera segura. Per pudëi fé i cursc de abilitazion (TFA, "Tirocinio formativo attivo") iel da fé n test de amiscion che ie plutosc rie. I cursc che vën śën pitei ai nsenianc vel sciche l TFA per pudëi ruvé tla graduatories" spiega l ntendënt Roland Verra.
La dumandes per i cursc speziei muessa unì mandedes ite nchin ai 25 de setëmber 2013 ala Ntendënza Ladina, streda Binder 29 a Bulsan. L ie de bujën de lëtra recumandeda cun resposta.
I cursc per nsenianc reverda l plan dla stieres per nsenianc de tlas dla scoles elementeres y duta la categuries de cuncors per la scoles mesanes y autes. I cursc speziei ne vel nia per nsenianc de religion.
Fé pea possa chiche ne à nia na stiera segura y deguna abilitazion spezifica. L vën damandà n titul de studi y trëi ani de nseniamënt.
Nfurmazion plu a puntin ie da giapé tla lëtra zirculera publicheda sun www.provinzia.bz.it/ntendenza-ladina ulache l ie nce i formuleres de iscrizion y pra Elisabetta Rindler (0471 417018) o Veronika Prossliner (0471 417015).
(USP)
as
