Atualità
Jonta provinziela lëura sun arjontes urbanistiches
Do che l Parlamënt talian ova dat pro che la Provinzia de Bulsan posse regulamenté nstëssa la lizënzes ti raions de produzion y la destanzes danter la cëses, à la Jonta provinziela (NCUEI) ai doi de setëmber tratà la doi arjontes: Per i raions de produzion muessa l Guviern a Roma tré de reviers l recurs, per la destanzes possel unì fat na delibra dla Jonta provinziela.
Tla tratatives danter l presidënt di ministri Enrico Letta y presidënt dla Provinzia Durnwalder foven ruvei a una che la Provinzia dëssa inò giapé la cumpetënzes che l Guviern talian da dant ti ova tëut. N cont de urbanistica se tratel dantaprima de doi ponc: la destanza minima danter la cëses y la regulamentazion dla lizënzes de cumerz a detail ti raions de produzion.
L proscimo var n cont dla lizënzes ie che l Guviern talian tire de reviers si recurs dan la Chëurt costituzionela. La Jonta provinziela à nciarià si presidënt Durnwalder de se damandé chësc da premier Letta tres lëtra. "Son per na liberalisazion dl cumerz, ma messon nce tenì cont dla premisses n cont de raions abitatives daujin y dificulteies de trafich" à dit Luis Durnwalder do la senteda dla Jonta.
La cumpetënza n cont dla destanzes danter la cëses vën nterpreteda sciche bele data de reviers ala Provinzia. "Mpede 10 metri de destanza minima jiran de reviers ala regulamentazion da dant y tlo tlechel na delibra dla Jonta provinziela" à dit Durnwalder. (USP)
as
