Atualità
Ngrandì l servisc "meteo-ladin": nueva plata online
L servisc de previjion dl tëmp cun na lingia de nfurmazions y servijes tla rujeneda ladina ie unì ngrandì y vën da (NCUEI) 5 de setëmber prejentà sun la plata web nueva www.provinzia.bz.it/meteo-ladin. "Te chëla che la Provinzia pieta śën l servisc meteo te duta si vela nce tla rujeneda ladina, vën nosta rujeneda de mendranza nce te chësc cajo trateda ala pèr cun l'autres" sorissea l assessëur Florian Mussner.
Avisa dan nuef mënsc fovel unì scumencià a publiché la previjions meteo nce tla rujeneda ladina. Davia che l servisc meteo ne reverda nia me la previjions, ma nce na lingia de servijes, oven scumencià cun na verscion plu scëmpla, adateda per ti cialé cun i smartphone. Ma śën possen al adres www.provinzia.bz.it/meteo-ladin udëi na plata nueva cun truep servijes sëuraprò. Chiche ti cëla tres computer possa dantaldut udëi miec la pertes grafiches sciche per ejëmpl l radar dala plueia o la cameres web.
L servisc meteo ngrandì nce tla rujeneda ladina à per l Assessëur ladin n valor dopl: "Da una pert ti pieta la Provinzia inò n servisc nuef ala jënt ladina y davia che chësc vën nuzà damat truep da dut l Sudtirol y dai turisć, ti dal na majera visibltà a nosta mendranza" dij Florian Mussner.
Da nuef sun la plata ladina dl Servisc meteo iel n iede i servijes che taca prò pra la previjions. Tlo possen se abuné debant ala previjions tres e-mail, al servisc RSS o se tò ju n widget tres chël che uni un possa giapé la previjions meteo per ladin nce sun na si plata internet persunela. Tla rubrica di valores atuei possen dlongia la stazions dal tëmp (nce a San Martin, Sëlva y Piz Pisciadù), śën nce udëi la mesurazions dla stazions dal'ega. Tl raion ladin nen iel nce una a Puntives y a Mantëna Todëscia. Na nuvità de mpurtanza da pont de ududa dla rujeneda ie la rubrica cun la spiegazion de 40 esprescions dla terminologia metereologica. La verscion plu scëmpla dl servisc meteo-ladin, per l fonin, à sën l adres nueva www.provinzia.bz.it/meteo-ladin/mobile.
L ngrandimënt dl servisc meteo per ladin ie l resultat de na culaburazion danter l Servisc de Comunicazion, l Ufize per cuestions linguistiches y la sozietà de nfurmatica SIAG. Uni di dala 9 danmesdì vëniel dant ora la previjions spezifiches per i raions (da permò nce n raion Ladinia-Dolomites) y dala 11 danmesdì possen pona udëi la previjions atueles per dut l Sudtirol y l tëmp sa mont.
Per ti pité n servisc nuef ala jënt ladina y per valorisé la mendranza oven tëut la scumenciadiva de mëter a jì nce tla rujeneda ladina chëi servijes che vën nuzei l plu de duc. Nsci fovel unì dat priorità la Rë zivica cun 44 milion de vijites al ann y l Servisc meteo cun 33 milion de vijites al ann. Do nuef mënsc che l vën nce pità la verscion ladina possen udëi che jënt ladina i nuzea truep. La singula plates dla Rëi zivica (www.provinzia.bz.it) ie nchiamò unides vijitedes 21.567. L servisc meteo à te nuef mënsc arjont 20.877 vijites cun na media de 2.319 al mëns. Ultimamënter ie l meteo-ladin unì vijità mo de plu arjunjan tl ultimo mëns 3.657 vijites. Ai 28 de agost, canche l raion meteo nuef "Ladinia - Dolomites" ie jit on line, ie unì arjont la majera cumpëida de vijites cun 468 te n sëul di.
"La zifres dla vijites ala Rë zivica y al servisc meteo per ladin testemunieia che i servijes che la Provinzia ti pieta al jënt ladina te si rujeneda vën nce dassënn nuzei y chësc ie n sëni tler che la mëndranza tën sun si rujeneda dl oma" dij Florian Mussner. (USP)
Servisc meteo per ladin
www.provinzia.bz.it/meteo-ladin
verscion per l fonin
www.provinzia.bz.it/meteo-ladin/mobile
as
