Atualità
Permafrost: escurscion al Lech dl Dragon y film te Sëlva
La dlacia dl permafrost y si cunseguënzes sun l’eghes tl ejëmpl dl Lech dl Dragon sun Mëisules ie l cuntenut de doi manifestazions: n vënderdi ai 20 de setëmber vëniel te Sëlva mustrà per l prim iede n film che trata chësc argumënt y l di do, la sada ai 21, vëniel fat n’escurscion al Lech dl Dragon.
"L'ega da bever dla populazion de Sëlva vën garantida dala dlacia dl Lech dl Dragon": sce la ie veramënter nscila, puderan nrescì pra na sëira de film, referat y descuscion te Sëlva. N vënderdi ai 20 de setëmber uniral mustrà per l prim iede n film che ie unì fat n ucajion dl proiet "Permaqua". L sarà da udëi i resultac de studi tl Sudtirol y Tirol dl nord n cont de resserves d'ega dlacedes ite ti raions da mont. Te chësc proiet che ova scumencià dl 2011 iel nce unì analisà la situazion dl Lech dl Dragon. La sëira tla Cësa de Cultura de Sëlva, cun scumënciamënt dala 20.00, unirà giaurida cun na ntroduzion dl ambolt Peter Mussner. Do l film tenirà l geologh provinziel Volkmar Mair n referat sun l permafrost y l proiet "Permaqua". L publich puderà rujené pea te na descuscion cun i relatëures y l regisseur dl film Dennis Timm cun si cameraman Helmut Lechthaler.
Na mprescion sun l post, possa duc i nteressei se fé l di do, la sada ai 21 de setëmber pra na escurscion al Lech dl Dragon. I geologs provinziel mustrerà co che i analisea l permafrost cun l aiut de na sonda che i ova metù ite l ann passà d'instà canche l fova unì furà ju drët sot per analisé la dlacia. L'escurscion unirà mueta dal jëuf de Frea jan feter doi ëura a pe su per la val Setus.
Nteressei a jì pea pra chësta escurscion possa se lascé nuté su nchin l di dant, vënderdi ai 20 de setëmber, tl ufize turistich de Sëlva (telefonn 0471 777 900, e-mail: selva@valgardena.it)
De plu nfurmazion sun l proiet ie nce da giapé tres internet sun www.permaqua.eu. (USP)
as
