Aministraziun | 23.09.2013 | 14:07

Prudoc da tlo per i chemuns

Nce sce i chemuns muessa se tenì ala regules naziuneles per cumpré prudoc y servijes, possel zënz' auter unì tenì cont dla firmes da tlo. Chësc ie unì stlarì (NCUEI) ai 23 de setëmber tla senteda dla Jonta provinziela deberieda cun i esperc dl'agenzia nueva per ncëries publiches, n cont dla roba da maië.

Sce na cësa de paussa, na scolina o na mensa compra prudoc da tlo, ne vëniel nia me sustenì i produtëures dl raion, ma l vën nce gaujà trasporc plu curc y de cunseguënza stravardà l ambient. La Jonta provinziela respuend nscila ala cuestion che produtëures da tlo ne possa aldò dla regules nueves tl cheder dla spending review, nia plu unì tëuc n cunsciderazion. "I prudoc da tlo possa zënz' auter unì cumprei dal'aministrazions publiches, nce sce les muessa se tenì a vel normatives" à spiegà l presidënt Luis Durnwalder riesc do ala senteda dla Jonta provinziela.

Nchin a na soma de 40.000 euro al ann possa l'aministrazions publiches cumpré prudoc zënza scrì ora la ncëria, ma chiran ora danter cin prupostes. La rejon de cumpré da produtëures dl post muessa, aldò de Durnwalder unì giustificheda. L Presidënt dla Provinzia à te cunferënza stampa nunzià l ejëmpl di prudoc frësc y la cuantità che ne se lascia nia prugramé giut danora.

La segonda categuria reveda somes da 40.000 nchin a 200.000 euro al ann. Tlo muessel unì damandà preventives aldò dla cater categuries de roba da maië (prudoc dl lat, cërn, pësc y prudoc de pasta) y cater raions. Chësc possa unì fat cun l aiut dl portal web dl'agenzia provinziela. N chemun possa tlo se crì ora n produtëur y se damandé na pruposta tres l'agenzia. A chësta maniera vëniel garantì na bona cualità di prudoc, plu flessibltà tl crì ora y trasporc plu curc.

Sce la ncëria reverda na soma de passa 200.000 euro al ann, muessela unì scrita ora a livel europeich. N tel cuncors vën nce fat dal'Agenzia provinziela per ncëries publiches danter i produtëures scric ite ti registri aldò.

L Presidënt dla Provinzia à metù a cuer che l'Agenzia provinziela pieta nce cunsulënza canche la se trata de pitla ncëries.

Nfurmazions per ti jì plu sot a chësta tematica ie nce publichedes sun la plata web dl Agenzia por i prozedimënć y la verda di contrać publics de lëures, sorvisc y fornidöres  www.provinzia.bz.it/aov/. (USP)

as